ჩინეთმა რუსეთიდან ელექტროენერგიის იმპორტი 1-ელი იანვრიდან სრულად შეწყვიტა და მინიმალური სახელშეკრულებო მოცულობების (დაახლოებით 12 მეგავატი) შესყიდვაზეც კი უარი თქვა. ამის შესახებ "კომერსანტი" წყაროებზე დაყრდნობით იუწყება.

მათი ცნობით, ჩინეთში ელექტროენერგიის ექსპორტის განახლება 2026 წელს ნაკლებად სავარაუდოა. გამოცემის წყაროებმა მიწოდების შეჩერების მთავარ მიზეზად ექსპორტის ფასების ზრდა დაასახელეს, რომელიც ჩინეთში ელექტროენერგიის შიდა ფასებს აღემატებოდა, რაც პეკინისთვის შემდგომი შესყიდვები წამგებიანი იყო.

Meduza-ს ცნობით, "ინტერ რაოს" რუსეთის შორეული აღმოსავლეთიდან ჩინეთში ჭარბი რაოდენობით ელექტროენერგია გაჰქონდა ექსპორტზე. კონტრაქტი ჩინეთის სახელმწიფო ელექტროგადამცემ კორპორაციასთან 2012 წელს გაფორმდა და 2037 წლამდეა ძალაში. მთელი პერიოდის განმავლობაში, ჩინეთში დაახლოებით 100 მილიარდი კილოვატ-საათი, ანუ წელიწადში დაახლოებით ოთხი მილიარდი კილოვატ-საათი უნდა მიეწოდებინა.

"მხარეები ამჟამად აქტიურად იკვლევენ ელექტროენერგიით ვაჭრობის შესაძლებლობებს. რუსული მხარის ინიციატივით ექსპორტის კონტრაქტის შეწყვეტა არ იგეგმება. ჩინურმა მხარემ, რომელთანაც ჩვენ მუდმივ კომუნიკაციაში ვართ, ასევე არ გამოთქვა ინტერესი კონტრაქტის შეწყვეტის მიმართ", — განაცხადა "ინტერ რაომ".

კომპანიამ დასძინა, რომ შორეული აღმოსავლეთის ენერგოსისტემაში ელექტროენერგიის მოხმარება დაჩქარებული ტემპით იზრდება და არსებობს გენერაციის დეფიციტი, რამაც გამოიწვია ექსპორტის სიმძლავრის შემცირება და ჩინეთში მიწოდების შეზღუდვა.

"კომერსანტის" ცნობით, 2012 წლიდან 2020 წლამდე ჩინეთში ექსპორტი საშუალოდ სამ მილიარდ კილოვატ-საათს შეადგენდა წელიწადში. 2021 წელს მიწოდება 30%-ით გაიზარდა მას შემდეგ, რაც ჩინეთმა მოითხოვა ექსპორტის გაზრდა ჩრდილო-აღმოსავლეთის რეგიონებში ენერგიის დეფიციტის დასაფარად. მიწოდებამ პიკს 4.7 მილიარდ კილოვატ-საათს მიაღწია 2022 წელს. თავდაპირველად კონტრაქტი ჭარბი ელექტროენერგიის გაყიდვას ისახავდა მიზნად, თუმცა შორეული აღმოსავლეთის ელექტროქსელში სიმძლავრის დეფიციტის გამო, ექსპორტი 2023 წლის აგვისტოდან მცირდება და მინიმუმს 2025 წელს აღწევს.

გამოცემა წერს, რომ რუსეთიდან ჩინეთში ელექტროენერგიის მიწოდების მოცულობა ჩინეთის შიდა წარმოებასთან შედარებით საკმაოდ შემცირდა, ამიტომ "ბალანსის თვალსაზრისით, ჩინეთის ელექტროქსელს შეუძლია ამ მოცულობების ჩანაცვლება".