ოცნების ხელისუფლების საგარეო საქმეთა სამინისტრო "რადიო თავისუფლების" მიერ გავრცელებულ ცნობას ეხმაურება იმის შესახებ, რომ 15 იანვარს აშშ-ს მიერ კარიბის ზღვაში დაკავებული ტანკერის, Veronica-ს ეკიპაჟის შემადგენლობაში საქართველოს მოქალაქეები იმყოფებოდნენ.

უწყებაში განმარტავენ, რომ "ინფორმაციის დასაზუსტებლად, საქართველოს საელჩო აშშ-ში ახორციელებს შესაბამის სამუშაოებს".

"2026 წლის 15 იანვარს, აშშ-ს მიერ კარიბის ზღვაში დაკავებული ტანკერის, Veronica-ს ეკიპაჟის შემადგენლობაში საქართველოს მოქალაქეების ყოფნასთან დაკავშირებით ღია წყაროებში გავრცელებული ინფორმაციის დასაზუსტებლად, საქართველოს საელჩო აშშ-ში ახორციელებს შესაბამის სამუშაოებს", — წერია უწყების მიერ რადიო თავისუფლებისთვის მიწერილ წერილში.

მათვე ცნობით, "ამ დრომდე საგარეო საქმეთა სამინისტროში ინფორმაცია საქართველოს მოქალაქეების დაკავებასთან დაკავშირებით არ შემოსულა".

ცნობისათვის, 20 იანვარს "რადიო თავისუფლებას" მეზღვაურების ოჯახის წევრებმა მიაწოდეს ინფორმაცია იმის შესახებ, რომ 15 იანვარს კარიბის ზღვაში ვენესუელასთან კავშირის გამო დაკავებულ ტანკერ Veronica-ზე, რომელიც გაიანის დროშის ქვეშ ცურავდა, 5 ქართველი მეზღვაური იყო.

ტანკერი "ვერონიკა" მეექვსე ტანკერია, რომელიც აშშ-ის შეიარაღებული ძალების სამხედრო სარდლობამ ვენესუელასთან კავშირების გამო დააკავეს.