დრო სწრაფად გადის, განსაკუთრებით მაშინ, როცა საქმე სერიალებს ეხება. პროექტები, რომლებიც 2000-იანების დასაწყისში ჩვენი ყოველდღიურობა იყო, დღეს უკვე ორ ათწლეულზე მეტს ითვლის. ეს სერიალები მხოლოდ რეიტინგული ჰიტები არ ყოფილა, მათ შეცვალეს ტელევიზიის ენა, შექმნეს საკულტო პერსონაჟები და მთელი თაობის კულტურულ მეხსიერებაში დაიკავეს ადგილი. გადავხედოთ სერიალებს, რომელთაც ოფიციალური პრემიერიდან 20+ წელი შეუსრულდათ და რომლებიც დღესაც აქტუალურია.

Sex and the City (1998–2004)

სექსი დიდ ქალაქში ერთ-ერთი პირველი სერიალი იყო, რომელმაც ქალების პირადი ცხოვრება, ურთიერთობები და სექსუალობა ტელევიზიაში ღიად და უშუალოდ წარმოაჩინა. ქერი ბრედშოუსა და მისი მეგობრების ისტორიები არა მხოლოდ სიუჟეტურად, არამედ სტილისტურადაც ეპოქის სიმბოლოდ იქცა. სერიალმა ძლიერი გავლენა მოახდინა როგორც პოპკულტურაზე, ისე ტელევიზიის ნარატივზე.

The Sopranos (1999–2007)

სერიალი, რომელმაც თანამედროვე ტელედრამის ფორმა შეცვალა და ანტიგმირი მთავარ ფიგურად აქცია. ტონი სოპრანო დღემდე რჩება ერთ-ერთ ყველაზე გავლენიან პერსონაჟად სატელევიზიო ისტორიაში.

CSI: Crime Scene Investigation (2000–2015)

CSI-მ კრიმინალური ჟანრი ლაბორატორიაში გადაიტანა და კრიმინალისტიკური მეცნიერება მაყურებლისთვის მთავარ სანახაობად გარდაქმნა. სერიალმა არაერთი სპინ-ოფი წარმოშვა და წლების განმავლობაში ერთ-ერთ ყველაზე რეიტინგულ პროექტად დარჩა. მისი ვიზუალური და თხრობის სტილი დღემდე ასოცირდება 2000-იანების ტელევიზიასთან.

Six Feet Under (2001–2005)

სერიალი, რომელმაც სიკვდილი ჩვენთან უფრო ახლოს მოიყვანა და ყოველდღიურობის ნაწილად აქცია. Six Feet Under ოჯახურ დრამას ფილოსოფიურ კითხვებთან აერთიანებდა და ტელევიზიაში ერთ-ერთი ყველაზე გამორჩეული ფინალით შევიდა ისტორიაში. პროექტი ხშირად სახელდება "ოქროს ეპოქის" HBO-ს ერთ-ერთ მთავარ ნამუშევრად.

The Wire (2002–2008)

მოსმენა ხშირად სახელდება ყველა დროის ერთ-ერთ საუკეთესო სერიალად და არა მხოლოდ კრიმინალური ჟანრის ფარგლებში. სერიალი ბალტიმორის ქალაქს სხვადასხვა სეზონში სხვადასხვა სისტემის ჭრილში აჩვენებს: ნარკობიზნესი, პოლიცია, პორტი, პოლიტიკა, განათლება და მედია ერთ მთლიან სურათად იკვრება. აქ ვერ შეხვდებით ცალსახად დადებით ან უარყოფით პერსონაჟებს, სერიალი სისტემურ პრობლემებზე საუბრობს და სწორედ ამ სიღრმემ აქცია საკულტო ნამუშევრად.

Lost (2004–2010)

ავიაკატასტროფის შემდეგ იდუმალ კუნძულზე აღმოჩენილი ადამიანები და კითხვები, რომლებმაც მაყურებელი წლები აცხოვრა თეორიებში. დაკარგულები ერთ-ერთი პირველი გლობალური "სატელევიზიო ფენომენი" გახდა, რომელმაც ონლაინ განხილვები და ფან-თეორიები მასობრივ მოვლენად აქცია.

Desperate Housewives (2004–2012)

იდეალურად მოვლილი უბანი, საიდუმლოებები და შავი იუმორი. სასოწარკვეთილი დიასახლისები ერთდროულად იყო სატირა, დრამა და დეტექტივი, რომელმაც ქალ პერსონაჟებს ცენტრალური ადგილი მიანიჭა ტელევიზიაში.

House (2004–2012)

ცინიკური ექიმი და არასტანდარტული დიაგნოზები. ექიმმა ჰაუსმა სამედიცინო დრამას ანტიგმირის ფიგურა დაუმატა და ჰიუ ლორის შესრულება სერიალის მთავარ იდენტობად აქცია. პროექტი წლების განმავლობაში ერთ-ერთი ყველაზე ყურებადი სერიალი იყო.

Prison Break (2005–2017)

გაქცევის დეტალურად დაგეგმილი ისტორია და სხეულზე ამოტვიფრული გეგმა. გაქცევა 2000-იანების ერთ-ერთი ყველაზე დაძაბული და მასობრივი ჰიტი იყო, რომლის პირველი სეზონი დღემდე საკულტოდ ითვლება.

Grey's Anatomy (2005–დღემდე)

სერიალი, რომელმაც სამედიცინო დრამა ემოციურ ქრონიკად შემოგვთავაზა. გრეის ანატომია არა მხოლოდ ექიმების პროფესიულ ცხოვრებაზე, არამედ მათ პირად ურთიერთობებზე ამახვილებდა ყურადღებას და დღემდე რჩება ერთ-ერთ ყველაზე ხანგრძლივ ჰიტად.