საერთაშორისო გამჭვირვალობა — საქართველოს 5 ივლისს დაზარალებული 24 ჟურნალისტის სახელით შინაგან საქმეთა სამინისტროს წინააღმდეგ სარჩელი შეაქვს. ორგანიზაცია იცავს On.ge-ის, მთავარი არხის, ფორმულასა და TV პირველის წარმომადგენლთა ინტერესებს, რომლებსაც პროფესიული მოვალეობის შესრულების დროს ძალადობრივი ჯგუფები ფიზიკურად დაუპირისპირდნენ.

TI განმარტავს, რომ სახელმწიფომ არ შეასრულა კონსტიტუციით დაკისრებული ვალდებულება, არ დაიცვა ჟურნალისტების ჯანმრთელობა და ვერ უზრუნველყო მათი პროფესიული საქმიანობის შესრულებისათვის სათანადო პირობები, ამიტომ ორგანიზაცია მორალური ზიანის ანაზღაურებას მოითხოვს. გარდა ამისა, გეგმავს, კიდევ ერთი სარჩელით მიმართოს სასამართლოს იმ მატერიალური ზარალის ანაზღაურების მოთხოვნით, რომელიც ტელეკომპანიებს მიადგათ.

"ეს არის ადმინისტრაციული დავა. ამ შემთხვევაში ჩვენ შინაგან საქმეთა სამინისტრო დასახელებული გვყავს როგორც სახელმწიფოს წარმომადგენელი, ის სტრუქტურული ერთეული, რომელსაც უნდა აღესრულებინა გაწერილი პოზიტიური ვალდებულება. მას პროაქტიულად და ქმედითად უნდა დაეცვა ამ ადამიანების უფლებები, ვინც მოსარჩელეა და სხვების, ვინც მოსარჩელე არ არის. თუმცა, ჩვენ კიდევ ერთხელ ხაზგასმით აღვნიშნავთ, რომ აქ დგას სახელმწიფოს პასუხისმგებლობა მთლიანად", — განაცხადა იურისტმა, თეონა ზაქარაშვილმა.

ორგანიზაციის თავმჯდომარე, ეკა გიგაური ამბობს, რომ მზად არიან, იჩივლონ ყველა ინსტანციის სასამართლოში და საჭიროების შემთხვევაში მიმართონ სტრასბურგს. მანვე აღნიშნა, რომ თუ 5 ივლისს დაზარალებული სხვა მედიების წარმომადგენლები გამოთქვამენ სურვილის, ორგანიზაცია მათ ინტერესებაც დაიცავს.

"ჩვენ გვაქვს უტყუარი მტკიცებულებები იმასთან დაკავშირებით, რომ საქართველოს მთავრობას და კერძოდ, შინაგან საქმეთა სამინისტროს აბსოლუტურად ყველა საშუალება ჰქონდა იმისთვის, რომ დაეცვა ჟურნალისტები იმ დღეს, მაგრამ მან ეს რესურსი არ გამოიყენა და ეს გადაწყვეტილება არ მიიღო. ამიტომ, ვფიქრობთ, რომ ამით მან დაარღვია საქართველოს კონსტიტუცია", — განაცხადა გიგაურმა.

ორგანიზაციის განმარტებით, თავი მოუყარეს ვიდეო და წერილობით მტკიცებულებებს, რომლებიც ჯამში 6 საათის მასალასა და 400 გვერდზე მეტ დოკუმენტს მოიცავს, ასევე დამატებითი ინფორმაცია გამოითხოვეს შინაგან საქმეთა სამინისტროდან 5 ივლისს განხორციელებული ღონისძიებების შესახებ.

5-6 ივლისს ჰომოფობიურ და ძალადობრივი ჯგუფების თავდასხმის შედეგად მედიის 53 წარმომადგენელი დაშავდა. პრორუსული ალტ ინფოს წევრები ფიზიკურად დაუპირისპირდნენ On.ge-ის ჟურნალისტ, თამთა კახაბერიძესაც და საქმიანობის შესრულებაში ხელი შეუშალეს. პროკურატურამ მას დაზარალებულის სტატუსი მიანიჭა.

გარდა ამისა, ძალადობრივი ჯგუფები თავს დაესხნენ თბილისი პრაიდის, სირცხვილიასა და ადამიანის უფლებათა ცენტრის ოფისებსაც. 11 ივლისს, აქციაზე ნაცემი TV პირველის ოპერატორი, ლექსო ლაშქარავა გარდაიცვალა.

ამ ძალადობას წინ უძღოდა ქართული ოცნების ლიდერებისა და პრემიერმინისტრის განცხადებები იმაზე, რომ ღირსების მარშს მიზანშეწონილად არ მიიჩნევენ. ჰომოფობიური და ძალადობრივი კონტრაქციის ორგანიზატორები ამ დრომდე არ დაუკავებიათ.