ლელომ პარლამენტს სამხედრო და კაცობრიობის წინააღმდეგ მიმართულ დანაშაულზე რეზოლუციის პროექტი წარუდგინა. პარტიის წევრმა, სალომე სამადაშვილმა გამართულ ბრიფინგზე აღნიშნა, რომ ომის დაწყების დღიდან საქართველოს პარლამენტს უკრაინასთან დაკავშირებით, არცერთი დოკუმენტი არ მიუღია.

სამადაშვილის განცხადებით, რეზოლუციით უკრაინაში მიმდინარე მოვლენების შეფასებას გააკეთებენ, ასევე, ხელისუფლებას მოუწოდებენ, უკრაინასთან და საერთაშორისო ინსტიტუტებთან აქტიური თანამშრომლობის ფორმატები შეიქმნას.

რეზოლუციის პროექტის ტექსტში ნათქვამია, რომ პარლამენტი რუსეთის შეიარაღებული ძალების მიერ უკრაინის სუვერენულ ტერიტორიაზე ჩადენილ ქმედებებს გმობს და ის ომისა და კაცობრიობის წინააღმდეგ დანაშაულთა ნიშნებს აშკარად შეიცავს. ამასთან, ჩადენილია საერთაშორისო სამართლის უგულებელყოფით სხვა მძიმე დანაშაულები.

"მოუწოდებს საერთაშორისო თანამეგობრობას, ყველა შესაძლო ძალისხმევა მიმართოს რუსეთის ფედერაციის შეიარაღებული ძალების მიერ უკრაინის სუვერენულ ტერიტორიაზე განხორციელებული ომის დანაშაულების დაუყოვნებლივ გამოძიებისა და დასჯის მიზნით. მოუწოდებს ყველა სახელმწიფოს, გამოიყენოს მათ ხელთ არსებული სხვადასხვა საერთაშორისო ფორმატები, პლატფორმები და მექანიზმები რუსეთის ფედერაციის პრეზიდენტის, ვლადიმერ პუტინის, რუსეთის შეიარაღებული ძალების ხელმძღვანელებისა და მეთაურების, რუსეთის უშიშროების საბჭოს წევრებისა და ყველა შესაბამისი თანამდებობის პირის მიმართ, სამართლებრივი პასუხისმგებლობის დასაკისრებლად, უკრაინის ტერიტორიაზე არაპროვოცირებული შეჭრისა და ჩადენილი ომის დანაშაულებისთვის", — აღნიშნულია ტექსტში.

ამასთან ერთად, რეზოლუციის პროექტში წერია, რომ პარლამენტი აღმასრულებელ ხელისუფლებას ავალებს, მჭიდროდ ითანამშრომლოს უკრაინის ხელისუფლებასთან, იმისთვის, რომ 2008 წლის ომში მოხდეს რუსეთის მიერ საქართველოში ჩადენილი დანაშაულების დოკუმენტირებისა და სამართალწარმოების მიმართულებით მიღებული გამოცდილების გაზიარება.

"აღმასრულებელ ხელისუფლებას სთხოვს, დაეხმაროს უკრაინის ხელისუფლებას სისხლის სამართლის სასამართლოს პროკურორის გამოძიებასა და გაეროს ადამიანების უფლებათა უმაღლესი კომისრის ოფისის კომისიის მოკვლევაში, უკრაინის პოზიციების დასაცავად საჭირო მასალის შეგროვებაში, როგორც ორმხრივ ფორმატებში, ასევე ევროკავშირთან აღნიშნული მიმართულებით თანამშრომლობის გზით. მხარი დაუჭიროს ყველა საერთაშორისო ფორმატში, მათ შორის სისხლის სამართლის საერთაშორისო სასამართლოსა და მართლმსაჯულების საერთაშორისო სასამართლოში, რუსეთის შესაბამისი წარმომადგენლებისათვის სამართლებრივი პასუხისმგებლობის დაკისრებისკენ მიმართულ ნაბიჯებს", — აღნიშნულია რეზოლუციის პროექტში.

დაბოლოს, ტექსტში ვკითხულობთ, რომ პარლამენტი აღმასრულებელ ხელისუფლებას ავალებს, გაეროს ადამიანის უფლებების საბჭოს წევრის სტატუსის შეჩერებას მხარი დაუჭირონ.