ეკონომიკის მინისტრის, ლევან დავითაშვილის განცხადებით, სტრატეგიულ მეგობრებს მოეთხოვებათ მეტი ყურადღება და პატივისცემა. მისი თქმით, საზოგადოება ელოდება კონკრეტულ მტკიცებულებებს, რითაც განცხადების ავტორების რეპუტაცია შენარჩუნდეს.

"სტრატეგიულ მეგობრებს, პარტნიორებს, ძმებს მოეთხოვებათ ცოტა მეტი, ალბათ, ყურადღებაც და პატივისცემაც. განცხადებას უნდა მოაყოლო კონკრეტული ფაქტები. არა მხოლოდ საქართველოს საზოგადოებამ, არამედ რამდენადაც ეს იყო საერთაშორისო განცხადებები, საერთაშორისო თანამეგობრობამ და საზოგადოება დაელოდება და ელოდება კონკრეტულ მტკიცებულებებს იმისთვის, რომ ისევ და ისევ განცხადების ავტორების რეპუტაცია იყოს შენარჩუნებული", — თქვა მან.

უკრაინის საგარეო საქმეთა მინისტრის, დმიტრო კულებას განცხადებით, საქართველომ დამაჯერებელი მტკიცებულებები უნდა წარმოადგინოს, რომ საქართველოს მთავრობა ხელს არ უწყობს რუსეთს კონტრაბანდული საქონლის შეტანაში.

უკრაინის დაზვერვა აცხადებს, რომ რუსეთი ცდილობს საქართველოს ტერიტორიიდან კონტრაბანდული საქონლის შეტანას, რაშიც საქართველოს მთავრობა ხელს უწყობს. მათი ინფორმაციით, ქართულმა სპეცსამსახურებმა მიიღეს დავალება პოლიტიკური პირებისგან, არ ჩარეულიყვნენ ამ საკითხში.

პასუხად ფინანსთა სამინისტრომ განაცხადა, რომ ეს დაუსაბუთებელი და აბსურდული ბრალდებაა. უწყების თქმით, რუსეთისთვის სანქციების დაწესების დღიდან საქართველო ახორციელებს უმკაცრეს კონტროლს ქვეყნის ყველა საბაჟო პუნქტზე.

ქართული ოცნების თავმჯდომარემ, ირაკლი კობახიძემ კი უკრაინის განცხადებას ალოგიკური უწოდა. მან ამ შემთხვევაშიც ნაციონალური მოძრაობის როლზე ისაუბრა და თქვა, რომ ადამიანები, რომლებიც საქართველოში ოპოზიციაში არია, უკრაინის ხელისუფლების ნაწილი არიან.

ამავე თემაზე: