საგარეო საქმეთა კომიტეტის თავმჯდომარე, გიორგი ხელაშვილი ფიქრობს, რომ უკრაინის ელჩის გაწვევას უკრაინა-საქართველოს ურთიერთობებთან არანაირი კავშირი არ აქვს. მისი თქმით, საქართველო იყო არის და იქნება უკრაინის ყველაზე უფრო მხარდამჭერი ქვეყანა. მან ახსენა ისიც, რომ ეს უკრაინის შიდა პოლიტიკური დიპლომატიური საქმეა.

"გუშინდელმა განცხადებამ უკრაინის პრეზიდენტის მხრიდან, ვფიქრობ, რომ გვაჩვენა, რომ ეს არის უკრაინის შიდა პოლიტიკური დიპლომატიური საქმე. რომელზეც ჩვენ არ ვართ რაიმე ფორმით უფლებამოსილი, არ არის მიღებული, ახლა კომენტარები ვაკეთოთ რა ხდება შიგნით და როგორ ხდება. თუმცა მე ვფიქრობ, ამ გაწვევას ელჩის არანაირი კავშირი არ აქვს უკრაინა-საქართველოს ურთიერთობებთან, ვინაიდან საქართველო იყო არის და იქნება უკრაინის ყველაზე უფრო მხარდამჭერი ქვეყანა", — ამბობს ის.

გუშინ, 30 მარტს უკრაინულმა მედიამ დაწერა, რომ ვოლოდიმირ ზელენსკიმ საქართველოდან და მაროკოდან ელჩები გაიწვია. როგორც ზელენსკი განმარტავს, არიან ადამიანები, რომლებიც ყველასთან მუშაობენ სახელმწიფოს დასაცავად და არიან ისეთებიც, რომლებიც მხოლოდ "თანამდებობაზე დარჩენისთვის" მუშაობენ. სწორედ ამ დროს პრეზიდენტმა თქვა, რომ ხელი მოაწერა ასეთი ადამიანის გაწვევას და მაროკოს ელჩი დაასახელა.

იქვე აღნიშნა, რომ უკრაინის ელჩი საქართველოდან სამშობლოში დაბრუნებულია. ეს დაბნეულობას იწვევს, რადგან ზელენსკიმ კონსულტაციებისთვის ელჩი ერთი თვის წინ გაიწვია, თუმცა ამ დრომდე იგორ დოლგოვი საქართველოში იმყოფებოდა.

ზელენსკიმ საქართველოდან ელჩი კონსულტაციებისთვის პირველ მარტს გაიწვია. მაშინ უკრაინის პრეზიდენტმა განაცხადა, რომ ამის მიზეზი სანქციებზე "ამორალური პოზიცია" და უკრაინაში მოხალისეების წასვლაში ხელის შეშლა იყო.

საქართველოში უკრაინის ელჩის მოვალეობას ანდრეი კასიანოვი ასრულებს. სპეციალურ ბრიფინგზე მან აღნიშნა, რომ ზელენსკი კონსულტაციებზე გაწვეულ ელჩთან სხვადასხვა საკითხს, მათ შორის, უკრაინაზე საქართველოს პოზიციას განიხილავდა.

ამ დრომდე ცნობილი იყო, რომ ელჩი იგორ დოლგოვი საქართველოშია. ის რამდენჯერმე იმყოფებოდა უკრაინაში დაღუპული ქართველი მებრძოლების ხსნოვის პატივსაცემად გამართულ აქციაზე.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში