სოციალური სამართლიანობის ცენტრის განცხადებით, საქართველო სასამართლოსთან დაკავშირებით, ევროასოცირებით ნაკისრ ვალდებულებებს არ ასრულებს. მათი თქმით, აქციების ფონზე ხელისუფლებამ ევროკავშირს გაწევრიანების თაობაზე მიმართა, თუმცა მხოლოდ განაცხადი წარმატების გარანტია ვერ იქნება.

ისინი აღნიშნავენ, რომ პოლიტიკური ნების ნაკლებობისა და ფრაგმენტული საკანონმდებლო ინიციატივების გამო რეფორმა რეალური ძალაუფლების გადანაწილებასა და სისტემაში დე ფაქტო გავლენიანი ჯგუფების არსებობას არ შეეხო. ორგანიზაციაში კლანურობაზე დაფუძნებულ მმართველობაზე ამახვილებენ ყურადღებას და აღნიშნავენ, რომ სისტემას მცირე გავლენიანი ჯგუფები არა სამართლიანობის პრინციპების, არამედ პირადი ინტერესების შესაბამისად აკონტროლებენ.

"მიუხედავად გაკეთებული განაცხადისა, ევროკავშირი საქართველოს ურთიერთობების მიმართულებით უკანასკნელ პერიოდში განვითარებული მოვლენები აჩვენებს, რომ საქართველოს მთავრობა არ გამოხატავს ერთგულებას ევროკავშირში გაწევრიანების შესახებ გაცხადებული მიზნების მიმართ, რაც პირველ რიგში 2014 წელს დადებული ასოცირების დღის წესრიგის შეუსრულებლობაში გამოიხატება. ასოცირების დღის წესრიგის განხორციელება დემოკრატიის მშენებლობაში საქართველოს პროგრესისთვის, მისი ინსტიტუტების გაძლიერებისა და ევროპულ სტრუქტურებთან ინტეგრაციისთვის, გადამწყვეტი მნიშვნელობის მატარებელია", — ნათქვამია განცხადებაში.

ორგანიზაციაში ამბობენ, რომ ხელისუფლების მხრიდან ევროკავშირის ინსტიტუტებისა და ღირებულებების მიმართ უპატივცემულობის ყველაზე ნათელი მაგალითი 19 აპრილის შეთანხმების გაუქმება იყო.

"19 აპრილის შეთანხმებით საქართველოს სასამართლოს დემოკრატიზაციის პროცესში დასავლური ღირებულებების გაზიარების რეალური შანსი ჰქონდა. შესაბამისად, ხელშეკრულებით ნაკისრი ვალდებულებების შეუსრულებლობა დამოუკიდებელი და მიუკერძოებელი მართლმსაჯულების ინსტიტუტების ჩამოყალიბებისთვის კიდევ ერთი ხელიდან გაშვებული შესაძლებლობაა", — აღნიშნავენ ისინი.

განცხადებაში ხაზგასმულია ისიც, რომ ევროკავშირმა სასამართლო რეფორმების შედეგებზე უკმაყოფილება არაერთხელ გამოხატა, შემდეგ კი მიკროფინანსური დახმარება შეუჩერა. ორგანიზაციის თქმით, კრიტიკის მიუხედავად, ხელისუფლებამ უზენაესი მოსამართლეების დანიშვნის კონკურსი არ შეაჩერა.

ორგანიზაცია აღნიშნავს, რომ სასამართლო რეფორმების შედეგებით იმედგაცრუების შემდეგ სტრატეგიის რადიკალური შეცვლაა აუცილებელი.

"გადასადგმელი ნაბიჯები მიმართული უნდა იყოს სასამართლო ხელისუფლების კონსენსუსზე დაფუძნებული მართვის მოდელის დამკვიდრებისაკენ. რეფორმამ ასევე ძალაუფლების კონცენტრაციის თავიდან ასაცილებლად მყარი დაბრკოლებები უნდა შექმნას. მხოლოდ ამ პროცესის შემდეგ არის შესაძლებელი როგორც სასამართლო რეფორმის, ასევე ევროკავშირთან დაახლოების შემდეგ ეტაპზე გადასვლა", — ნათქვამია განცხადებაში.

საქართველომ ევროკავშირის წევრობის კანდიდატის სტატუსის მიღებაზე განაცხადს ხელი 3 მარტს მოაწერა.