პრეზიდენტის, სალომე ზურაბიშვილი განცხადებით, უნდა შეიქმნას ევროკავშირში ინტეგრაციის სახელმწიფო მინისტრის თანამდებობა და აპარატი. მისივე თქმით, თანამდებობაზე, შესაძლოა, ოპოზიციის წევრი შეირჩეს.

მისივე თქმით, ყველა ძალისხმევა უნდა იქნას გამოყენებული, როგორც ევროკავშირში გაწევრიანების, ასევე, უკრაინის საკითხზე ერთიანი პოზიციების ჩამოსაყალიბებლად.

"გთავაზობთ, რომ სასწრაფოდ შეიქმნას ევროკავშირში ინტეგრაციის სახელმწიფო მინისტრის თანამდებობა და აპარატი, რომელიც შეიძლება ოპოზიციის წიაღიდან იქნას შერჩეული. ის განახორციელებს კოორდინაციას, რათა გაწევრიანების მოთხოვნები მყისიერად იქნას შესრულებული, როგორც სხვა კანდიდატი ქვეყნების შემთხვევაში ხდება", — თქვა მან.

ზურაბიშვილმა, ასევე, აღნიშნა, რომ მიესალმება ევროკავშირში გაწევრიანებაზე ღარიბაშვილის განცხადებას, რეზოლუციას, გარდა ამისა, საზოგადოების სხვა პეტიციებსა და ინიციატივებს. პრეზიდენტმა "ყველა ამ წამოწყების" გაერთიანების ინიციატივა გამოთქვა.

"ყველას მოვუწოდებ, რომ ეს რეზოლუცია ერთსულოვნად იქნას მიღებული. ასევე, გავეცანი რამდენიმე არასამთავრობოს მიერ შექმნილ განცხადებას, საზოგადოების სხვა პეტიციებს, თუ ინიციატივებს, რომლებსაც ასევე მივესალმები. გთავაზობთ, რომ ყველა ეს წამოწყება იყოს გაერთიანებული და ყველამ ერთად მოვაწეროთ ხელი ერთ დოკუმენტს, რომელიც იქნება ჩვენი განაცხადის მხარდამჭერი და ნიშანი ამ საკითხზე ჩვენი სრული ერთიანობისა, და გადაეგზავნოს ევროკავშირს ერთ პაკეტად საქართველოს სახელით", — დასძენს ის.

გაიგე მეტი: