კიდევ ერთი ჟურნალისტი რუსეთიდან აცხადებს, რომ საქართველოში არ შემოუშვეს. Medizona-ის წარმომადგენლის თქმით, უარის ასე განუმარტეს — "სხვა მიზეზი". სწორედ ამ ფორმულირებით გააბრუნეს არაერთი კრიტიკული რუსი ჟურნალი და ოპოზიციონერი პოლიტიკოსი.

"ყოველთვის მეგონა, რომ რუსეთს უკანასკნელი დავტოვებდი, მაგრამ იმის გაკეთება, რასაც ვაკეთებთ და იმის თქმა, რასაც ვფიქრობთ, ახლა რუსეთში სრულიად შეუძლებელია. და გაჩუმება და კიდევ უფრო გაჩერება შეუძლებელია.

40 საათი ვიყავით საზღვრისკენ მიმავალ გზაზე, 2 დღე ველოდით მის გახსნას ზვავსაშიშროების შემდეგ, 8 საათი ვიდექით რუსეთის მხარეს, ქართულზე 14 (!) საათი ველოდით, მხოლოდ იმიტომ, რომ ჩემს ქმარს, ჟურნალისტ დევიდ ფრენკელისთვის უარი ეთქვათ შესვლაზე ფორმულირებით "სხვა მიზეზები", — წერს ტვიტერზე ვარია ზოლი.

აქვე ის განმარტავს, რომ ამდღეებში მსგავსი უარი მიიღო დამოუკიდებელი მედიის კიდევ რამდენიმე ჟურნალისტმა, რომლებიც ახლა ყველაზე მეტად და წარმოუდგენელი რისკის ფასად წერენ ომზე.

თავად ჟურნალისტი აცხადებს, რომ უარის თქმამდე მესაზღვრეები სხვადასხვა პირებს ურეკავდნენ და ეკითხებოდნენ, როგორ უნდა მოქცეულიყვნენ.

"მომწონს, როცა საქართველოს ხელისუფლება წერს, რომ ყველა გადაწყვეტილებას უარზე მესაზღვრეები ადგილზე იღებენ. 14 საათი სადღაც ურეკავდნენ, მხრებს იჩეჩავდნენ და ხანდახან ბოდიშსაც კი იხდიდნენ, რომ თვითონ არ იცოდნენ და პასუხს სადღაც ზემოდან ელოდებოდნენ. საბოლოო ჯამში, უარი. არ გვაჭმევდნენ, მაგრამ საცოდაობის გამო დივანთან მიგვიშვეს", — წერს ის.