ჯორჯიან ეარვეისის განცხადებით, მათ საგადასახადო ბარათით "მირ" დღემდე არცერთი ბილეთი არ გაუყიდიათ. კრიტიკის შემდეგ ისინი განმარტავენ, რომ ჯორჯიან ეარვეისს ხელშეკრულება აქვს დადებული ესპანურ კომპანია WebSky.tech-თან, რომელიც გაყიდვებს ახორციელებს, როგორც Visa და Mastercard-ით, ასევე "მირის" მეშვეობით.

ინფორმაცია იმის შესახებ, რომ ჯორჯიან ეარვეისის საიტზე გადახდის სისტემაში მასტერქარდისა და ვიზას გვერდით რუსული "მირ" გაჩნდა, თავდაპირველად რადიო თავისუფლებამ გაავრცელა.

"ბოლო დღეებში, "ჯორჯიან ეარვეისთან" დაკავშირებით შექმნილია ყოვლად უსაფუძვლო აჟიოტაჟი, რომელსაც სპეციალური ბრიფინგიც მიუძღვნა ბატონმა ნიკანორ მელიამ.

გვინდა ყველას გავუცრუოთ იმედები და სრული პასუხისმგებლობით განვაცხადოთ, რომ ჯორჯიან ეარვეისს საგადახდო ბარათი "მირის" მეშვეობით დღემდე არცერთი ბილეთი არ გაუყიდია.

აქვე განვმარტავთ, "ჯორჯიან ეარვეისს" ხელშეკრულება აქვს დადებული ევროკავშირში (კერძოდ, ესპანეთში) რეგისტრირებულ, ესპანურ კომპანია WebSky.tech-თან, რომელიც არის ავიაბილეთების გაყიდვის საერთაშორისო სისტემა. მოცემული კომპანიის მეშვეობით, მრავალი ავიაკომპანია ყიდის სამგზავრო ბილეთებს, მათ შორის, ჩვენც. WebSky.net-ი გაყიდვებს ახორციელებს ამერიკული საბარათე სისტემების Visa და Mastercard-ით და, აგრეთვე, "მირის" მეშვეობით. მთლიანად ეს სისტემა მიერთებულია საქართველოს ბანკთან. აქედან გამომდინარე, თავისთავად გამორიცხულია, რომ ჩვენი ბილეთების შეძენა "მირის" მეშვეობით განხორციელდეს", — აღნიშნულია განცხადებაში.

განცხადებაში, ასევე, აღნიშნულია, რომ ჯორჯიან ეარვეისსა და მის მენეჯმენტს ესპანურ კომპანიაზე ზეგავლენის მოხდენა არ შეუძლიათ, ხოლო თვითონ კომოანია ამჟამად მძიმე ფინანსურ მდგომარეობაშია და არის გაკოტრება/რეაბილიტაციის სტადიაში.

დღეს, 9 მარტს ნაციონალური მოძრაობის თავმჯდომარემ, ნიკა მელიამ ბრიფინგზე განაცხადა, რომ ჯორჯიან ეარვეისი რუსულ სისტემაში ჩაერთო და ბილეთების გაყიდვა დაიწყო, რითაც პირდაპირ ხელს უწყობს რუსეთის ფიზიკურ და იურიდიულ პირებს სანქციების გვერდის ავლაში. მისი თქმით, კომპანია ამ ნაბიჯს ხელისუფლების თანხმობისა და ნებართვის გარეშე ვერ გადადგამდა.