სახელმწიფო დუმამ ერთხმად და დაუყოვნებლივ, სამი მოსმენით მიიღო კანონპროექტი, რომელიც რუსი სამხედროების ქმედებების შესახებ "ცრუ" ინფორმაციის გავრცელებაზე სასჯელს აწესებს. ის უკვე ძალაში შევიდა, რადგან პუტინმა მალევე დაამტკიცა.

კანონი კრემლის ვებგვერდზე გამოქვეყნდა, თუმცა ამ ეტაპზე ის მიუწვდომელია. მედიებიდან კი ასეთ ინფორმაციას ვიგებთ:

BBC-ის რუსული ბიუროს განმარტებით, რუსეთის დუმის სათათბირომ მიიღო კანონი, რომლის მიხედვითაც რუსეთის შეიარაღებული ძალების ქმედებების შესახებ "ცრუ" ინფორმაციის გავრცელებაში პასუხისმგებელ პირებს სამ წლამდე თავისუფლების აღკვეთა ემუქრებათ. თუ ეს "ყალბი" ინფორმაცია გავრცელდა ორგანიზებული ჯგუფის მიერ, ან თან ახლდა "მტკიცებულებების გაყალბება", მაქსიმალური სასჯელი 10 წლამდე იზრდება. ხოლო თუ "არასანდო" ინფორმაციის გავრცელებამ სერიოზული შედეგები გამოიწვია, "დამნაშავეებს" 15 წლამდე თავისუფლების აღკვეთა ემუქრებათ. როგორც ინტერფაქსი წერს, გარდა ამისა, სასამართლოს შეეძლება დააკისროს ჯარიმა 700 ათასიდან 1,5 მილიონ რუბლამდე, გამოსასწორებელი სამუშაოები ერთ წლამდე, იძულებითი შრომა სამ წლამდე ან თავისუფლების აღკვეთა იმავე ვადით.

BBC-ის ინფორმაციით, ცვლილებები ასევე ითვალისწინებს რუსეთის შეიარაღებული ძალების "დისკრედიტაციის" აკრძალვას. ამ ტიპის პირველი დარღვევა გამოიწვევს ადმინისტრაციულ პასუხისმგებლობას, ხოლო მეორე — უკვე ჯარიმას 100-დან 300 ათას რუბლამდე ან თავისუფლების აღკვეთას. Meduza-ს ინფორმაციით, ამ მუხლით ისჯება მოწოდებები იმის წინააღმდეგ, რომ რუსული ჯარები "რუსეთის ფედერაციის და მისი მოქალაქეების ინტერესების შესაბამისად, საერთაშორისო მშვიდობისა და უსაფრთხოების უზრუნვესალყოფად" გამოიყენონ.

სავარაუდოდ, ეს იმ დამიანების წინააღმდეგაა მიმართული, ვინც უკრაინაში ომის შეწყვეტას ითხოვს, რადგან ინტერფაქსი წერს, რომ ეს მუხლი ადგენს სისხლის სამართლებრივ პასუხისმგებლობას საჯარო ქმედებებსა და განცხადებებზეც. კერძოდ, თუ ვინმე შეეწინააღმდეგება რუსეთის ჯარების გამოყენებას "დასახული მიზნებისთვის", მათთვის მინიმალური სასჯელი იქნება ჯარიმა 100-დან 300 ათას რუბლამდე, მაქსიმალური — თავისუფლების აღკვეთა 5 წლამდე. მათივე თქმით, მაქსიმალური სასჯელის დაწესება შეთავაზებულია, თუ რუსი სამხედროების წინააღმდეგ საჯარო ქმედებებმა გამოიწვია მოქალაქეების ჯანმრთელობისა და სიცოცხლისთვის ზიანის მიყენება, ქონების დაზიანება, არეულობები, სამოქალაქო ინფრასტრუქტურის ფუნქციონირების შეფერხება, მათ შორის კომუნიკაციებისა და ტრანსპორტის.

როგორც BBC წერს, სახელმწიფო დუმამ მიიღო კიდევ ერთი კანონი, რომელიც ითვალისწინებს თავისუფლების აღკვეთას სამ წლამდე, თუ ვინმე რუსეთის ფედერაციის წინააღმდეგ სანქციებს მოითხოვს.

მანამდე როსკომნადზორმა განაცხადა, რომ რუსული მედია სამხედრო ოპერაციებს მხოლოდ ოფიციალური რუსული წყაროებიდან მიღებული ინფორმაციის საფუძველზე უნდა აშუქებდეს. მათ მედიისგან მოითხოვეს სტატიების წაშლა, რომლებშიც უკრაინაში მომხდარს "ომს" ან "თავდასხმას" უწოდებდნენ. შემდეგ კი დაბლოკეს რამდენიმე დამოუკიდებელი მედია საშუალება და სოციალური ქსელები.