"ეს არის საკუთარი თავისა და იმ მილიონების გადარჩენის მცდელობა, რომელიც მან წლების განმავლობაში, ქართული ოცნების სახელით, ქართველ ხალხს მოჰპარა", — ასე მოეხმაურა ერთიანობა-ნაციონალური მოძრაობის ლიდერი თინა ბოკუჩავა ირაკლი ღარიბაშვილის პოლიტიკიდან წასვლას. მისი თქმით, ირაკლი ღარიბაშვილმა თავი გადაირჩინა.

"ეს არის საკუთარი თავისა და იმ მილიონების გადარჩენის მცდელობა, რომელიც მან წლების განმავლობაში, ქართული ოცნების სახელით, ქართველ ხალხს მოჰპარა და ასევე, არის სურვილი, რომ მას და მის ოჯახის წევრებს ევროკავშირის ქვეყნებსა და აშშ-ში შესვლა, მოგზაურობა, სწავლა და ცხოვრება შეეძლოთ. რეალურად, ეს არის პოლიტიკიდან და ქართული ოცნების თავმჯდომარეობიდან მისი წასვლის მიზეზი", — განაცხადა ბოკუჩავამ.

ირაკლი ღარიბაშვილმა პოლიტიკიდან წასვლის შესახებ განცხადება დღეს გააკეთა. მან თქვა, რომ საქმიანობას კერძო სექტორში გააგრძელებს, ოპოზიციაში წასვლას არ აპირებს და რჩება ბიძინა ივანიშვილის და ქვეყნის ერთგულ ჯარისკაცად.