"ჩვენ ვთავაზობთ აშშ-ს, რომ გვქონდეს ახალი ფურცლიდან სტრატეგიული პარტნიორობა", — ამის შესახებ ოცნების პარლამენტის თავმჯდომარემ, შალვა პაპუაშვილმა განაცხადა.

"ჩვენი მიზანია, აშშ-ის ახალ ადმინისტრაციას ვაჩვენოთ, რომ ჩვენი მხრიდან სტრატეგიული პარტნიორობის ახალი ფურცლიდან დაწყებისთვის სრული მზადყოფნაა. ისეთი პარტნიორობისთვის, რომელიც იქნებოდა არა ცარიელი სიტყვები, როგორიც ეს იყო ბაიდენის ადმინისტრაციის დროს, როდესაც ტკბილ სიტყვას გვეუბნებოდნენ, თითქოს სტრატეგიული პარტნიორები ვიყავით, მაგრამ საქმეზე ხდებოდა ქართული დემოკრატიისთვის ძირის გამოთხრა ამერიკული დაფინანსების მიერ. ზუსტად იმ თაღლითური სქემებით, რომელიც ტრამპის ადმინისტრაციამ ამხილა. ჩვენ ვთავაზობთ, რომ გვქონდეს ახალი ფურცლიდან სტრატეგიული პარტნიორობა. რა შეგვიძლია, რომ საქართველომ შევთავაზოთ აშშ-ის, მგონი, ეს დროთა განმავლობაში ვაჩვენეთ. ჩვენ ვიყავით და ვრჩებით აშშ-ის ყველაზე სანდო პარტნიორად რეგიონში. გადახედონ წარსულს, იფიქრონ მომავალზე, დაფიქრდნენ და ყველამ გაანალიზოს, ვართ თუ არა ჩვენ აშშ-ის ყველაზე სანდო პარტნიორი რეგიონში", — განაცხადა პაპუაშვილმა.

შეგახსენებთ, რომ 2024 წლის 30 ნოემბერს ცნობილი გახდა, რომ აშშ-მ საქართველოსთან მრავალწლიანი პარტნიორული ურთიერთობა შეაჩერა. ამავე დღეს გადადგა აშშ-ში საქართველოს ბოლო ელჩი დავით ზალკანიანი და ამ დრომდე საქართველოს ვაშინგტონში ელჩი არ ჰყავს.

"ტვ იმედის" ეთერში ოცნების ხელისუფლების ეკონომიკისა და მდგრადი განვითარების მინისტრმა, ლევან დავითაშვილმა განაცხადა, რომ უახლოეს ხანებში საქართველოს ეყოლება ამერიკის შეერთებულ შტატებში ელჩი, რაც ორმხრივ ურთიერთობას კიდევ უფრო გააძლიერებს.