მას შემდეგ, რაც ქართული ოცნების თავმჯდომარემ, ირაკლი ღარიბაშვილმა თანამდებობის დატოვების შესახებ გააკეთა განცხადება, ბრიფინგზე ჟურნალისტმა ჰკითხა — "ისე მშვიდად არის მმართველ პარტიაში მდგომარეობა, რომ ახლა პარტიის თავმჯდომარემ თანამდებობა დატოვოს?" ამ კითხვაზე ღარიბაშვილმა უპასუხა: "მშვიდი სიტუაციაა ქვეყანაში, კარგი ამინდია".

ნაწყვეტი ბრიფინგიდან:

ჟურნალისტი: თქვენ მიდიხართ პოლიტიკიდან იმ დროს, როცა, თქვენივე პარტიის შეფასებითაც — ქვეყანაში არ არის მისაღები, მოსაწონი მდგომარეობა. გვყავს ერთპარტიული პარლამენტი, ინტენსიური სანქციებია ხოლმე დასავლეთის პარტნიორების მხრიდან თქვენი პარტიის მისამართით და ამ პირობებში მიიღეთ "სახლში წასვლის" გადაწყვეტილება. ისე მშვიდად არ არის [ყველაფერი], ახლა პარტიის თავმჯდომარე თანამდებობიდან წავიდეს.

ირაკლი ღარიბაშვილი: რა ხდება ქვეყანაში?

ჟურნალისტი: არაფერი ხდება ისეთი, რომ თქვენი მონაწილეობა ამ პროცესებში საჭირო იყოს?

ირაკლი ღარიბაშვილი: მე ვფიქრობ, რომ მშვიდი სიტუაციაა ქვეყანაში, კარგი ამინდია და რატომაც არა. შემდეგი...

ღარიბაშვილმა ბრიფინგზე განაცხადა, რომ ქვეყნიდან წასვლას არ აპირებს და როგორც ერთ-ერთი პატრიოტი, ყოველთვის შეიტანს თავის პატარა წვლილს ქვეყნის გაძლიერებაში.

"აბა, რა მინდა სხვაგან, რატომ უნდა წავიდე?! რა თქმა უნდა, საქართველოში ვრჩები. მე ეს ქვეყანა ყველაზე მეტად მიყვარს. არც ერთ ქვეყანაში ცხოვრებას არ განვიხილავ. ღმერთმა დამიფაროს, რომ სხვა ქვეყანაში ცხოვრებაზე ვიფიქრო. ეს ჩვენი ქვეყანაა მეგობრებო. ეს არის ჩვენი სამშობლო და ჩვენ ყველამ ჩვენი პოზიციიდან უნდა ვიფიქროთ ჩვენი ქვეყნის გაძლიერებაზე და დაცვაზე. ასე არის. რა მნიშვნელობა აქვს, ვინ სად იქნება და რომელ თანამდებობაზე? მე ასე ვუყურებდი. როგორც ერთ-ერთი პატრიოტი, მე, რა თქმა უნდა, ყოველთვის ვიოცნებებ ვიშრომებ, ჩემს პატარა წვლილს შევიტან ჩვენი ქვეყნის გაძლიერებაში", — განაცხადა ღარიბაშვილმა.