ვატიკანში პაპ ფრანცისკეს დაკრძალვის ცერემონიალი მიმდინარეობს — წმინდა პეტრეს ბაზილიკაში ტრამპი და ზელენსკი ერთმანეთს შეხვდნენ

ვატიკანში პაპ ფრანცისკეს დაკრძალვის ცერემონიალი მიმდინარეობს. დაკრძალვაზე იმყოფებიან მსოფლიოს ლიდერები, მათ შორის: აშშ-ს პრეზიდენტი დონალდ ტრამპი, საფრანგეთის პრეზიდენტი ემანუელ მაკრონი, გაერთიანებული სამეფოს პრემიერმინისტრი კირ სტარმერი, უკრაინის პრეზიდენტი ვოლოდიმირ ზელენსკი. ცერემონიალს ესწრებიან ასევე აშშ-ს ყოფილი პრეზიდენტი ჯო ბაიდენი. AP News-ის ფოტოებში გამოჩნდა "ოცნების" არჩეული პრეზიდენტი მიხეილ ყაველაშვილიც.

ვატიკანში პაპ ფრანცისკეს დაკრძალვას დაესწრება ასევე საქართველოს მე-5 პრეზიდენტი სალომე ზურაბიშვილი. სოციალურ ქსელში ზურაბიშვილმა თვითმფრინავის ბორტზე გადაღებული ფოტო გამოაქვეყნა, სადაც ის მსოფლიო პატრიარქ ბართლომესთან ერთადაა.

აშშ-ის პრეზიდენტმა დონალდ ტრამპმა და უკრაინის პრეზიდენტმა ვოლოდიმირ ზელენსკიმ შაბათს, რომის პაპ ფრანცისკეს დაკრძალვამდე რამდენიმე წუთით ადრე, უკრაინაში მიმდინარე ომის შესახებ მოლაპარაკებები წმინდა პეტრეს ბაზილიკაში გამართეს. ამის შესახებ CNN წერს.

**ზელენსკი და ტრამპი ერთმანეთს წმინდა პეტრეს ბაზილიკაში შეხვდნენ.**

ფოტო: CNN

ზელენსკის წარმომადგენელმა განაცხადა, რომ შეხვედრა დაახლოებით 15 წუთი გაგრძელდა და ლიდერები შეთანხმდნენ მოლაპარაკებების გაგრძელებაზე, შესაძლოა, შაბათს გვიან.

რომში ჩასვლისთანავე დონალდ ტრამპმა სოციალურ ქსელ Truth Social-ში დაწერა, რომ გასული პარასკევი „რუსეთთან და უკრაინასთან მოლაპარაკებებისა და შეხვედრების კარგი დღე“ იყო.

"ისინი ძალიან ახლოს არიან შეთანხმების მიღწევასთან და ახლა ორივე მხარეს უმაღლეს დონეზე შეხვედრა სჭირდება, რათა "ამის დასრულება" მოხდეს. "ძირითადი პუნქტების უმეტესობაზე უკვე შეთანხმებულია. შეწყვიტეთ სისხლისღვრა", — წერს ამერიკის პრეზიდენტი.

მედიაში გავრცელებული ცნობით, ვატიკანში ვოლოდიმირ ზელენსკი შეხვედრას მართვას საფრანგეთის პრეზიდენტ, ემანუელ მაკრონთან, სადაც უკრაინაში მიმდინარე ომსა და კონფლიქტის მოგვარების გზებს განიხილავენ.

**ემანუელ მაკრონი და ვოლოდიმირ ზელენსკი ვატიკანში.**

პაპი ფრანცისკე 21 აპრილს, 88 წლის ასაკში ავადმყოფობის შემდეგ გარდაიცვალა.

კათოლიკურ სამყაროში 9-დღიანი გლოვა დაიწყო. გარდაცვალებიდან 15-20 დღეში ვატიკანის სიქსტის კაპელაში ახალი პაპის არჩევის კონკლავი დაიწყება. ზუსტი თარიღი ჯერჯერობით არაა ცნობილი.

ბოლო ამბები:

გირჩევთ