სპეციალური პენიტენციური სამსახური განცხადებას ავრცელებს და მედიაში გავრცელებულ ინფორმაციას ეხმაურება იმის შესახებ, რომ პენიტენციურ დაწესებულებებში კვებითი მომსახურების შეფერხებაა.

უწყების მიერ გავრცელებულს განცხადებაში ნათქვამია, რომ აპრილის თვეში, უქმე დღეებში შეიქმნა საკვები პროდუქტების მიწოდების შეფერხება, მაგრამ დღესასწაულების დასრულების შემდეგ, კომპანიის მიერ საკვები პროდუქტების მიწოდება კვლავ შეუფერხებლად ხორციელდება.

"სპეციალური პენიტენციური სამსახური ეხმაურება მედიაში გავრცელებულ არასწორ ინფორმაციას და განმარტავს, რომ პენიტენციურ დაწესებულებებში ბრალდებულ/მსჯავრდებულთა და სამსახურის თანამშრომელთა კვებითი მომსახურება სრულად და შეუფერხებლად მიმდინარეობს.

საზოგადოების ინფორმირების მიზნით ასევე განვმარტავთ, რომ აპრილის თვეში, უქმე/სადღესასწაულო დღეებში შექმნილი მიწოდების შეფერხების გამო, სამსახურის მიერ დროებითი ღონისძიების სახით განხორციელდა კვების პროდუქტების ნაწილის შესყიდვა. აღსანიშნავია, რომ უქმე დღეების დასრულების შემდეგ, კომპანიის მიერ საკვები პროდუქტების მიწოდება კვლავ შეუფერხებლად ხორციელდება.

სპეციალური პენიტენციური სამსახური საინფორმაციო საშუალებებს მოუწოდებს, თავი შეიკავონ გადაუმოწმებელი ინფორმაციის გავრცელებისგან, რაც, როგორც საზოგადოების, ისე ბრალდებულთა/მსჯავრდებულთა ოჯახის წევრების შეცდომაში შეყვანას ისახავს მიზნად, — ნათქვამია გავრცელებულ ინფორმაციაში.