სიტყვა "ოჯახი" ყოველთვის უსაფრთხო და მყუდრო გარემოსა თუ მზრუნველი ადამიანების გარემოცვაში ყოფნას არ გულისხმობს. ხშირად ოჯახის წევრებს ერთმანეთთან ცუდი დამოკიდებულება აქვთ და "ნორმალური" ოჯახის სახის შენარჩუნებისთვის ტოქსიკურ გზებსაც მიმართავენ.

მაშ ასე, წარმოგიდგენთ 10 ქმედებას, მოლოდინსა თუ აზრს, რომელიც ოჯახებში ნორმალურადაა მიჩნეული, თუმცა სინამდვილეში ტოქსიკურია:

1. შეხედულება, რომლის მიხედვითაც, შვილებს მშობლების "ვალი" აქვთ

შვილის გაჩენის გადაწყვეტილებას ზრდასრული ადამიანები თავად, დამოუკიდებლად იღებენ, ამიტომ ფრაზა "ჩემი გაჩენილი ხარ" უსამართლო და ტოქსიკურია. მხოლოდ ბიოლოგიური კავშირი არ აძლევს მშობელს უფლებას, შვილს — დამოუკიდებელ პიროვნებას — თავს მუდამ საკუთარი სურვილები მოახვიოს და მისი ცხოვრება აკონტროლოს.

2. კომუნიკაციის ნაკლებობა ოჯახის წევრებს შორის

პრობლემის მოგვარებისათვის ოჯახის წევრებს შორის კომუნიკაცია, აზრების გაცვლა და ემოციების გაზიარება უმნიშვნელოვანესია. ზოგიერთ ოჯახში ეს ყველაფერი სირცხვილთან ასოცირდება და უმნიშვნელოდ ითვლება, რაც, რა თქმა უნდა, ოჯახის წევრების გაუცხოებას იწვევს.

3. პირადი სივრცის დარღვევა

კომუნიკაციის აუცილებლობა სულაც არ ნიშნავს იმას, რომ ოჯახის წევრებმა ერთმანეთს პირადი სივრცე უნდა დაურღვიონ. ერთმანეთის ოთახებში უნებართვოდ შესვლა, შეტყობინებების წაკითხვა და პირად ცხოვრებაში უხეშად ჩარევა მიუღებელია და ერთი ოჯახის წევრობა არ ამართლებს.

4. "როდის თხოვდები?" / "ცოლი როდის მოგყავს?"

გარკვეული ასაკის მიღწევისთანავე ზოგიერთი ოჯახის ერთადერთი სადარდებელი ისაა, თუ როდის იპოვის მათი შვილი ცოლს ან ქმარს. რა თქმა უნდა, შვილის დაოჯახების სურვილში უცნაური არაფერია, თუმცა ყოველდღიურად მათი დამცირება, კითხვებით შეწუხება და ზოგჯერ იძულებაც კი ტოქსიკურია.

5. "ნუ მეპასუხები"

ოჯახის უფროსი წევრების მიერ უმცროსების მსგავსი "არგუმენტით" დაჩაგვრა და მათთვის ახსნისა და აზრის გამოხატვის საშუალების წართმევა ზოგჯერ შესაძლოა, ფსიქოლოგიურ ძალადობასთანაც გავაიგივოთ. მსგავსი მიდგომა ადამიანებს არწმუნებს, რომ მათი აზრი და სიმართლე უმნიშვნელოა.

6. შვილების ერთმანეთთან შედარება

ალბათ, "სამაგალითო" უფროსი დისა თუ ძმისთვის შედარება და მშობლის სახეზე იმედგაცრუების დანახვა ყველა ბავშვის ყველაზე დიდი შიშია. ამის გამო ბავშვები ხშირად ფიქრობენ, რომ მათ ფასი მხოლოდ მაშინ აქვთ, როცა წარმატებას აღწევენ და ამისთვის ქებას იმსახურებენ. ამ მიდგომას, თვითშეფასებასთან დაკავშირებული პრობლემების გარდა, შესაძლოა, დედმამიშვილებს შორის ურთიერთობის გაფუჭებაც მოჰყვეს.

7. ის აზრი, რომ ოჯახის წევრს ყველაფერი ეპატიება

ოჯახში ფიზიკური ძალადობის შემთხვევაშიც კი უამრავი ადამიანი თვლის, რომ მსხვერპლმა დამნაშავეს დანაშაული მხოლოდ იმიტომ უნდა აპატიოს, რომ ერთი ოჯახის წევრები არიან. ეს, რა თქმა უნდა, მცდარი შეხედულებაა — ჩვენთვის ზიანის მოყენების უფლება არავის აქვს.

8. წონის შესახებ კომენტარები, რომელთაც "მზრუნველობით" ამართლებენ

ჩვენ ირგვლივ ხშირია ისეთი შემთხვევები, როცა ადამიანს ოჯახის წევრები წონის გამო დაცინიან ან აკრიტიკებენ და ამას "მზრუნველობით" ამართლებენ — თითქოს, მსგავს მიდგომას წონასთან და კვებასთან დაკავშირებული პრობლემების მოგვარება შეეძლოს.

9. ფიზიკური დასჯის ხერხების გამოყენება

ალბათ, უფროსი თაობისგან ხშირად გაგვიგია, რომ მშობლები ხშირად სცემდნენ. სახეში გარტყმა, შენჯღრევა თუ ბავშვების "გამოსასწორებლად" გამოყენებული სხვა გზები რომ ჯანსაღი და სწორი არაა, ამაზე ორი აზრი არ უნდა არსებობდეს.

10. ბავშვების იძულება, უცხო ადამიანებს ჩაეხუტონ ან აკოცონ

ჩვენ ირგვლივ მშობლები ბავშვებს ხშირად საყვედურობენ, როცა ისინი ხშირად უცხო ადამიანების ჩახუტებასა თუ კოცნაზე უარს აცხადებენ. ბავშვისთვის ფიზიკური კონტაქტის დაძალება მისი სურვილების უგულებელყოფასა და იმ მცდარი აზრის განმტკიცებას გულისხმობს, რომ სხვებს ჩვენთან ფიზიკური კონტაქტის დამყარების უფლება ჩვენი ნებართვის გარეშე აქვთ.

Responsible.ge ევროპაბეთის პლატფორმაა, რომელიც საზოგადოებაში აზარტული თამაშების შესახებ ცნობიერების ამაღლებასა და პასუხისმგებლობიანი თამაშის პოპულარიზაციას ემსახურება. ამასთანავე, პლატფორმის დახმარებით, შეგიძლიათ, გაეცნოთ პასუხისმგებლობიანი თამაშის ხელსაწყოებსა და ანგარიშებს, ასევე ინფორმაციას ევროპაბეთის პასუხისმგებლობის შესახებ საზოგადოების მიმართ, ბიზნესსა და კომუნიკაციაში.