2025 წლის ევროვიზიამდე სულ რამდენიმე დღეღა გვაშორებს. შვეიცარიის ქალაქ ბაზელში, რომელიც წლევანდელი ევროფესტივალის მასპინძელია, უკვე თითქმის ყველა ქვეყნის დელეგაცია ჩავიდა. დაწყებულია რეპეტიციებიც.

6 მაისს პირველი რეპეტიცია გაიარა საქართველოს წარმომადგენელმა მარიამ შენგელიამ. რეპეტიციის ფოტოებში, რომლებიც სულ ახლახან გავრცელდა, ქართველი კონკურსანტის სასცენო ჩაცმულობას და სცენოგრაფიასაც შეგვიძლია თვალი შევავლოთ. მომღერალთან ერთად, სცენაზე ანსამბლ ერისიონის მოცეკვავეები არიან.

პირველმა არხმა, რომელიც ევროვიზიის ორგანიზატორი ევროპის მაუწყებელთა კავშირის წევრია და ევროფესტივალისთვის კონკურსანტის შერჩევაზეა პასუხისმგებელი, მარიამ შენგელია დამოუკიდებლად, შიდაშესარჩევი კონკურსის გარეშე დაასახელა საქართველოს წარმომადგენლად.

შენგელიას საკონკურსო კომპოზიცია, სახელწოდებით Freedom ("თავისუფლება") ქეთი გაბისიანმა და ბუკა კარტოზიამ დაწერეს. საზმაუს მტკიცებით, სიმღერა "საერთაშორისო კონკურსზე ზუსტად წარმოაჩენს ჩვენი ქვეყნის კულტურულ იდენტობას".

აღსანიშნავია, რომ ევროვიზიაზე საქართველოს წარდგენის სურვილი წელს გამოთქვა Nini Iris-მაც და პირველ არხს საკუთარი სიმღერა გაუგზავნა. ნინი, რომელიც ამერიკული ვოისის ნახევარფინალისტი იყო, ევროვიზიის ქართველი გულშემატკივრების ერთ-ერთ მთავარ ფავორიტად მოიაზრებოდა.

რაც შეეხება მარიამ შენგელიას, წინათ საქართველოს ვარსკვლავისა და ვოისის მონაწილემ, გასულ წელს საზოგადოებას თავი წინასაარჩევნოდ ქართული ოცნების მხარდასაჭერ კონცერტებზე გამოსვლით დაამახსოვრა. ქართული ოცნების აქტიური მხარდამჭერია ევროვიზიის შარშანდელი მონაწილე ნუცა ბუზალაძეც, რომელიც წლევანდელ კონკურსზე საქართველოს ჟიურის ქულებს გამოაცხადებს.

რიგით 69-ე ევროვიზიის სიმღერის კონკურსის ნახევარფინალური ტურები 13 და 15 მაისს, ფინალი კი 17 მაისს გაიმართება. ევროპის ყველაზე მასშტაბურ მუსიკალურ ფესტივალზე წელს 37 ქვეყანა მიიღებს მონაწილეობას.

ასევე იხილეთ:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...