ლელოს ლიდერის, მამუკა ხაზარაძის განცხადებით, ბადრი ჯაფარიძისთვის მანდატის შეწყვეტა უსამართლობისა და კანონის ფეხქვეშ გათელვის განცდას ბადებს. მისი თქმით, ხელისუფლებას მხოლოდ ძალაუფლებისა და პირადი კეთილდღეობის შენარჩუნება ამოძრავებს.

"უსამართლობის განცდა, კანონის ფეხქვეშ გათელვა, პოლიტიკური დევნა, რაც გეუფლება, როცა უყურებ როგორ მოუხსნეს ბადრი ჯაფარიძეს საპარლამენტო მანდატი, სირცხვილია როცა ასეთი ყურმოჭრილი ხელისუფლება გყავს, რომელიც ერთი რუსი ოლიგარქის მიერ იმართება [...] ეს მალე დამთავრდება! ქართველი ხალხი არაა თქვენისთანა ხელისუფლების ღირსი, არაა ასეთი გაჭირვების და უიმედობის ღირსი!" — წერს ის.

ჯაფარიძისთვის მანდატის შეწყვეტას მხარი 77 დეპუტატმა დაუჭირა, 38 წინააღმდეგი იყო.

მისთვის მანდატის შეწყვეტის მიზეზად მმართველი გუნდი საქალაქო სასამართლოს მიერ მიღებულ გადაწყვეტილებას ასახელებს. საქართველოს კონსტიტუციის 39-ე მუხლის მიხედვით, პარლამენტის წევრს უფლებამოსილება ვადამდე შეუწყდება თუ სასამართლოს განაჩენით დამნაშავედაა ცნობილი.

პარლამენტმა მანდატი კიდევ ორ დეპუტატს — დროას ლიდერს, ელენე ხოშტარიასა და ლეიბორისტული პარტიის ლიდერს, შალვა ნათელაშვილსაც შეუწყვიტა.