პროგრამული უზრუნველყოფის არქიტექტორი, ღრუბლოვანი სისტემის ინჟინერი, მონაცემთა მეცნიერი, IT უსაფრთხოების სპეციალისტი, DevOps ინჟინერი — ეს 2022 წელს მსოფლიოს ყველაზე მოთხოვნადი და მაღალანაზღაურებადი პროფესიებია. ტექნოლოგიური პროფესიებისადმი ინტერესი წლიდან წლამდე იზრდება, ზრდადია თავად ტექ-ინდუსტრიაც, თუმცა ბაზარზე კი პროფესიონალებზე მოთხოვნა, განსაკუთრებით ჩვენს ქვეყანაში, ჯერ კიდევ მაღალია.

თიბისიმ, როგორც რეგიონის წამყვანმა ტექნოლოგიურმა კომპანიამ, 2019 წელს IT აკადემია დააფუძნა და მიზნად დაისახა, ახალგაზრდებისთვის ტექნოლოგიების დარგში თანამედროვე, ყველაზე მოთხოვნად და მაღალანაზღაურებად პროფესიების დაუფლებაში შეეწყო ხელი. სამ წელიწადზე ნაკლებ დროში 200-ზე მეტი კურსდამთავრებული თიბისის გუნდის წევრი გახდა.

მათ შორისაა თამარ დოკვაძე, თიბისის საოპერაციო ბიზნესის განვითარების ლიგის ასოცირებული პარტნიორი და ტესტირების ავტომატიზაციის ინჟინერი. თამარმა აკადემიის შესახებ მეგობრისგან შეიტყო, რის შემდეგაც აკადემიაში Front-end Development-ის შესწავლა გადაწყვიტა, ბოლოს კი თიბისის გუნდის წევრიც გახდა. თამარი მიიჩნევს, რომ მის კარიერულ წარმატებაში IT აკადემიამ დიდი როლი ითამაშა.

"აკადემიის დამსახურებაა, რომ მე ამ პოზიციაზე ვმუშაობ. აკადემიის დასრულების შემდეგ თიბისიში დავსაქმდი, იქ მიღებული ცოდნა კი სამუშაო პროცესში განვითარებაში კიდევ უფრო დამეხმარა", — აღნიშნავს ის.

თამარი მიიჩნევს, რომ ახალგაზრდებმა აუცილებლად უნდა მიმართონ საკუთარი რესურსები ტექნოლოგიებისკენ, რადგან ეს უკანასკნელი დღეს ყველაზე მზარდი და საინტერესო მიმართულებაა. "თიბისის IT აკადემია საუკეთესო საშუალებაა, რომ თანამედროვე ტექნოლოგიების გამოყენებით ისწავლო და განავითარო საკუთარი თავი", — აღნიშნავს იგი.

2019 წელს, აკადემიის გახსნისთანავე, Front-end დეველოპმენტის კურსი გაიარა გიორგი გვალიამ, რომელიც დღეს თიბისის პლატფორმების ლიგის ასოცირებული პარტნიორი და ტესტირების ავტომატიზაციის ინჟინერია.

კურსის გავლამდე გიორგი ამ სფეროში დასაქმებული არ ყოფილა, სწავლის დასრულებიდან წელიწადსა და ნახევარში კი შესაძლებლობა მიეცა, IT აკადემიაში მენტორად დაბრუნებულიყო.

"ტესტირების ავტომატიზაციის პირველ კურსზე, რომელიც 2020-ის დეკემბრიდან დაიწყო, ორგანიზაციულ საკითხებს ვხელმძღვანელობდი, სტუდენტებს ვუწევდი ტექნიკურ დახმარებას და ა.შ. კურსის დასრულების შემდეგ კი მალევე გავხდი ასოცირებული პარტნიორი", — ამბობს გიორგი.

აკადემიის პირველი ნაკადის კურსდამთავრებულია ლუკა ჩიტიაშვილიც, რომელიც თიბისის ციფრული ბიზნესის განვითარების ლიგის დეველოპერი და ასოცირებული პარტნიორია. IT აკადემიის დასრულების შემდეგ ლუკამ თიბისიში სხვადასხვა პროექტზე სხვადასხვა გუნდში იმუშავა.

IT აკადემიის კიდევ ერთი წარმატებული კურსდამთავრებული და თიბისის Chapter Lead-ია გიორგი არაბული, რომელმაც თიბისის აკადემიის შესახებ უნივერსიტეტში სწავლის ბოლო წელს შეიტყო. ის ამბობს, რომ მანამდე ტექნოლოგიური მიმართულებით მწირი ცოდნა ჰქონდა, აკადემიაში ჩაბარების შემდეგ კარგი თეორიული საფუძველი გაუჩნდა, მისი დასრულების შემდეგ კი თიბისის ინვესტიციების გუნდს შეუერთდა.

თიბისის ადამიანური კაპიტალის ხელმძღვანელის, გვანცა მურღვლიანის თქმით, თიბისი აკადემიას Boot camp პროგრამები გამოარჩევს, რაც იმას ნიშნავს, რომ კონკრეტულ სპეციალობას სტუდენტები ინტენსიურ ფორმატში, 3-დან 4 თვემდე პერიოდში ეუფლებიან. გარდა ამისა, გვანცას თქმით, კურსები, რომლებიც IT აკადემიაში ისწავლება, უნიკალურია.

"IT აკადემიაში ამჟამად 9 კურსი გვაქვს, რომლებიც ბაზარზე სხვაგან არ გვხვდება. 2019 წელს სამი კურსით დავიწყეთ, დროთა განმავლობაში კი სხვადასხვა მიმართულება დავამატეთ. ვგეგმავთ, მომავალში კიდევ უფრო მრავალფეროვანი გავხადოთ სასწავლო პროგრამები, თუმცა აკადემიის მიზანი — მოამზადოს ახალგაზრდები ყველაზე მოთხოვნად ტექნოლოგიურ მიმართულებებში და გაუხსნას მათ გზა კარიერული წარმატებისკენ, უცვლელი რჩება", — ამბობს გვანცა.

გვანცას თქმით, ტექნოლოგიური პროფესიები მომავალში კიდევ უფრო მოთხოვნადი გახდება, ამიტომ ახალგაზრდებმა ამ უნარების და ცოდნის განვითარებას დიდი ყურადღება უნდა დაუთმონ, ამაში კი მათ დახმარებას თიბისის IT აკადემია გაუწევს. კურსდამთავრებულები აღნიშნავენ, რომ ტექნოლოგებით დაინტერესებული ახალგაზრდები არ უნდა შეუშინდნენ დაბრკოლებებს, რადგან წინ "შესაძლებლობებით და საინტერესო გამოწვევებით სავსე კარიერა ელოდებათ".