"ბრიუსელი ითხოვს რომ ვთქვათ, რომ დედამიწა მრგვალი კი არ არის, ბრტყელია, ანუ ვთქვათ, რომ კაცი შეიძლება გახდეს ქალი, თუ ამას არ ვიტყვით გვპირდებიან, რომ მათ ცრუ იდეოლოგიურ კოცონზე დაგვწვავენ," — ასე ეხმაურება ოცნების პარლამენტის თავმჯდომარე შალვა პაპუაშვილი ევროკომისიის მიერ ოცნების საგარეო საქმეთა მინისტრის, მაკა ბოჭორიშვილისთვის გაგზავნილ წერილს, რომელშიც 8 რეკომენდაციის შესრულებაა მოთხოვნილი, წინააღმდეგ შემთხვევაში ევროკომისია აცხადებს, რომ მოუწევს, საქართველოს ვიზალიბერალიზაცია შეუჩეროს.

"მოქალაქეებმა უნდა გაიაზრონ, რა მოთხოვნები იქნა წამოყენებული ბრიუსელის მხრიდან. ერთი ეხება ოჯახური ღირებულებების და ბავშვთა უფლებების კანონპროექტს და მთავარი საკითხი რაც არის ამ კანონში არის ის, რომ ქალი ვერ გახდება კაცი და ქალი ვერ გახდება კაცი. ბრიუსელი გვეუბნება, რომ ჩვენ ავყვეთ ცრუ იდეოლოგიას და ვთქვათ, რომ კაცი შეიძლება გახდეს ქალი. ეს არის სინამდვილეში რაც არის მოწოდებული ამ კანონთან დაკავშირებით. ეს იგივეა, რომ ბრიუსელს მოეთხოვა გვეღიარებინა, რომ დედამიწა არის ბრტყელი. იმავე განზომილების ცრუ იდეოლოგია არის, რომ კაცი შეიძლება გახდეს ქალი. ევროპაში გვახსოვს პერიოდი, როცა ამას ამტკიცებდნენ, რომ დედამიწა არის ბრტყელი და ვინც ამბობდა, რომ დედამიწა არ არის ბრტყელი კოცონზე წვავდნენ. ზუსტად ამას მაგონებს ბრიუსელის დღევანდელი ქცევა, რომელიც ითხოვს რომ ვთქვათ, რომ დედამიწა მრგვალი კი არ არის, ბრტყელია, ანუ ვთქვათ, რომ კაცი შეიძლება გახდეს ქალი, თუ ამას არ ვიტყვით გვპირდებიან, რომ მათ ცრუ იდეოლოგიურ კოცონზე დაგვწვავენ. ჯერ ეს უნდა შევაფასოთ, რომ გავიაზროთ რასთან გვაქვს საქმე," — თქვა პაპუაშვილმა

ცნობისთვის, გუშინ, 16 ივლისს, ევროკომისიის მიგრაციის და საშინაო საქმეთა გენერალურმა დირექტორატმა ოცნების ხელისუფლების საგარეო საქმეთა მინისტრს, მაკა ბოჭორიშვილს წერილი გაუგზავნა და სთხოვა ინფორმაციის მიწოდება ევროკომისიის რეკომენდაციების შესრულების თაობაზე. წერილის ადრესატები არიან ასევე — ოცნების ხელისუფლების შს მინისტრი, გელა გელაძე და ევროკავშირის ელჩი საქართველოში პაველ ჰერჩინსკი. წერილის მიხედვით, ევროკომისია რეკომენდაციების შესრულებას ვიზების შეჩერების მექანიზმის შემდეგ, მე-8 ანგარიშში შეაფასებს და ამ შეფასების საფუძველზე, რეკომენდაციების შეუსრულებლობის შემთხვევაში, კომისიას შეუძლია ვიზალიბერალიზაციის შეჩერების მექანიზმის გააქტიურება.

მანამდე კი საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, კაია კალასმა ევროკავშირის საგარეო საქმეთა მინისტრების საბჭოს სხდომის დასრულების შემდეგ გამართულ პრესკონფერენციაზე განაცხადა, რომ ოცნებას აგვისტოს ბოლომდე მისცეს ვადა საქართველოს ვიზალიბერალიზაციის შეფასების მეშვიდე ანგარიშში ჩამოთვლილი რეკომენდაციების შესასრულებლად.

ასევე იხილეთ:

• რეკომენდაციების შეუსრულებლობის შემთხვევაში კომისიას შეუძლია ვიზალიბერალიზაციის შეჩერება — რას წერს ევროკომისია ბოჭორიშვილისთვის გაგზავნილ წერილში
• კაია კალასმა "ოცნებას" პირობების შესასრულებლად "დედლაინი" აგვისტოს ბოლომდე მისცა