გალუსტაშვილმა 11 პირის საქმეზე თარჯიმნის აცილება მხოლოდ თვითაცილების მოთხოვნის შემდეგ დააკმაყოფილა. რადიო თავისუფლების ლაივბლოგში ვკითხულობთ, რომ სერგეი კუხარჩუკისა და რუსლან სივაკოვის ადვოკატებმა თარჯიმნის, დავით გულიაშვილის აცილება მოითხოვეს. მათი თქმით, თარჯიმანმა ბრალდებულებს "უზრდელი" უწოდა.

"თარჯიმანი ბრალდებულებს მოიხსენიებს უზრდელად, არც ერთ სიტყვას არ უთარგმნის ბრალდებულებს და გვაქვს აცილების საფუძველი, თავის დაკისრებულ ვალდებულებებს არ ასრულებს", — თქვა ადვოკატმა, ბექა ხოხობაშვილმა.

ადვოკატების თქმით, მეორე თარჯიმანი, რომელიც ასევე სხდომაზე იმყოფება ხოლმე, მათთვის უფრო მისაღებია, რადგან ისაუბრეს ბრალდებულთან და შეიტყვეს, რომ "არ უთარგმნის, პოლემიკაში შედის, შეურაცხყოფას აყენებს".

თარჯიმნის თქმით კი ბრალდებულები მას აყენებდნენ შეურაცხყოფას, თუმცა აქამდე კომუნიკაციის პრობლემა თავად არ გაუჟღერებია. მხოლოდ ადვოკატების მიერ შუამდგომლობის დასაბუთებისას წამოდგა და განაცხადა:

"ეს არის ზეწოლა, ბრალდებული მომმართავდა ისე, როგორც არ უნდა მოემართა თარჯიმნისთვის."

საბოლოოდ, სასამართლომ თარჯიმნის თვითაცილება დააკმაყოფილა. გამოცხადდა ერთსაათიანი შესვენება. სხდომის გაგრძელებამდე სასამართლომ სხვა თარჯიმნის მოყვანა უნდა უზრუნველყოს.

ცნობისთვის, დაკავებულებს — ანდრო ჭიჭინაძეს, ონისე ცხადაძეს, ჯანო არჩაიას, რუსლან სივაკოვს, ლუკა ჯაბუას, გურამ მირცხულავას, ვალერი თეთრაშვილს, გიორგი ტერიშვილს, ირაკლი ქერაშვილს, რევაზ კიკნაძესა და სერგეი კუხარჩუკს ბრალი საქართველოს სისხლის სამართლის კოდექსის 225-ე მუხლის მეორე ნაწილით წარედგინათ, რაც ჯგუფურ ძალადობაში მონაწილეობას გულისხმობს.