მიგრაციის დეპარტამენტმა საიმიგრაციო კონტროლის ღონისძიების ჩატარებისას უცხო ქვეყნის 9 მოქალაქე დააკავა. ინფორმაციას შსს ავრცელებს.

უწყების ცნობით, ღონისძიების ფარგლებში დეპარტამენტის თანამშრომლების მიერ გადამოწმდა კონკრეტული ლოკაციები, რაც მიზნად ისახავდა საქართველოში კანონიერი საფუძვლის გარეშე მყოფ უცხო ქვეყნის მოქალაქეთა გამოვლენას. დაკავებულები — ნიგერიის, ბანგლადეშის, თურქმენეთის, ყაზახეთისა და ინდოეთის მოქალაქეები — საქართველოში "უცხოელთა და მოქალაქეობის არმქონე პირთა სამართლებრივი მდგომარეობის შესახებ" საქართველოს კანონით დადგენილ მოთხოვნათა დარღვევით იმყოფებოდნენ. მათ ლოკაციებზე შესწავლა და დაკავება წინასწარ მოპოვებული ინფორმაციის საფუძველზე განხორციელდა.

დეპარტამენტის ინფორმაციით, აღნიშნული პირები ამჟამად მოთავსებული არიან დროებითი განთავსების ცენტრში, მიმდინარეობს გაძევების კანონით გათვალისწინებული პროცედურები.

მიგრაციის დეპარტამენტი აცხადებს, რომ მსგავსი ღონისძიებები რეგულარულად გაგრძელდება საქართველოს იმიგრაციის კანონმდებლობის ეფექტური აღსრულების უზრუნველსაყოფად.