პარტია გახარია საქართველოსთვის წევრმა, გიორგი შარაშიძემ თვითმმართველობის არჩევნებზე საუბრისას განაცხადა, რომ მზად არიან როგორც უპარტიო, ასევე ნეიტრალური და ლელოს და გახარია საქართველოსთვის პარტიული წარმომადგენლების წარსადგენად.

მისი თქმით, კანდიდატებთან დაკავშირებული კონსულტაციები უკვე დაწყებულია. შარაშიძე ასევე აცხადებს, რომ ეს ნაბიჯი ოპოზიციური პარტიებს შორის კონკურენციას არ ნიშნავს, რადგან საერთო მიზანი — ქართული ოცნების ელექტორატის შემცირება — უცვლელია. მან ოპოზიციის კრიტიკასაც უპასუხა და აღნიშნა, რომ ისინი არჩევნების გზას მიჰყვებიან და განაცხადა, რომ ყველა საკუთარ საქმიანობას დაუბრუნდეს.

"იქნება სულ ორი ვარიანტი, ერთი — ეს იქნება პოლიტიკურად ნეიტრალური, უპარტიო კანდიდატი. საუბარია როგორც მერობის კანდიდატებზე, ასევე, საკრებულოში მაჟორიტარობის კანდიდატებზე, რომელსაც ექნება როგორც ჩვენი, ისე ლელოს და რაც მთავარია, სხვა ოპოზიციური პარტიების ამომრჩევლების მხარდაჭერაც. რაც შეეხება მეორე ვარიანტს — რა თქმა უნდა, შეიძლება იყვნენ პარტიული კანდიდატებიც. მაგალითად, ზოგ შემთხვევაში ლელოს კანდიდატი, ზოგ შემთხვევაში გახარია საქართველოსთვის კანდიდატი, მაგრამ ეს არ ნიშნავს იმას, რომ ჩვენ ერთმანეთთან კონკურენციაში შევალთ.

...რაც შეეხება ოპოზიციის კრიტიკას - მოდი ვუთხრათ მათ, რომ ყველამ საკუთარ პარტიას მიხედოს. მათ ურჩევნიათ ჩვენს მიერ დასმულ კითხვას, თუ რას აპირებენ ბოიკოტის შემთხვევაში, არჩევნების შემდეგ, მკაფიო პასუხი გასცენ, რომ საზოგადოებისთვის ცნობილი იყოს, რა შედეგი შეიძლება მოიტანოს ბოიკოტმა და როგორ შეიძლება ჩამოიშალოს ოცნება ბოიკოტის გზით. ჩვენ ჩვენი გზა გვაქვს. პირველივე დღიდან ვამბობდით, რომ მივდივართ არჩევნების გზით. მიგვაჩნია, რომ ოცნება არ იმსახურებს იმ ელექტორატს, რაც ჰყავს. გაცილებით ნაკლები ელექტორატი უნდა ჰყავდეს ოცნებას სამართლიანი არჩევნების პირობებში. ოცნებას ეშინია საკუთარი ელექტორალური ბაზის რყევის და დაკარგვის. ჩვენ ნამდვილად შეგვიძლია, ამ ადამიანებს ველაპარაკოთ. აკრიტიკონ ერთმანეთი და საკუთარი ნაბიჯები. ჩვენ ღრმად გვწამს ჩვენი არჩეული გზის," — განაცხადა შარაშიძემ.