ექსპრეზიდენტის განცხადებით, მასთან სტილისტი მოთხოვნიდან ერთ დღეში შეუშვეს, ხოლო ექიმებს უკვე 5 კვირაა ამის შესაძლებლობა არ ეძლევათ. სააკაშვილის თქმით, ეს ივანიშვილის ბრძანებით ხდება.

"მე თუ ხედავთ, ახალი შეკრეჭილი ვარ, გუშინწინ გამოვიძახე ციხეში სტილისტი, გუშინ ეს სტილისტი მოვიდა და გამკრიჭა. 5 კვირაა ჩემი ნიუ-იორკიდან ჩამოსული ექიმი, ნიკოლოზ ყიფშიძე წერს განცხადებას, რომ შემოუშვან ჩემთან. პარიკმახერი შემოუშვეს ერთ დღეში. ივანიშვილის ბრძანებით, უკვე 5 კვირაა ჩემთან არ უშვებენ ექიმებს. ეს იმ პირობებში, როდესაც მაქვს ძალიან ძლიერი სისუსტე. პირველად ცხოვრებაში მაქვს ჰიპერტონიასთან დაკავშირებული პრობლემები, მაქვს ანემია და აქედან გამომდინარე, ბევრი სხვა პროცესები", — თქვა მან.

ამ წუთებში საქალაქო სასამართლოში მიხეილ სააკაშვილის საზღვრის კვეთის საქმეზე პროცესი მიმდინარეობს. სააკაშვილმა სხდომა უკვე დატოვა. პროცესზე ადვოკატებმა სააკაშვილთან ექიმების შეშვების შუამგომლობა დააყენეს, რაც მოსამართლემ არ დააყმაყოფილა. ნიკა გვარამიას განცხადებით, სასამართლომ პენიტენციურ სამსახურს სააკაშვილსთვის ადეკვატური სამედიცინო მომსახურების გაწევა უნდა დაავალოს.

"პატიმრის გააკეთა განცხადება, რომ მისი ჯანმრთელობის მდგომარეობა გაუარესებულია, და მას არ ეძლევა ადეკვატური სამედიცინო მომსახურეობა, რაც არის არა მხოლოდ საქართველოს კანონმდებლობის დარღვევა, არამედ, არის კონვენციური ვალდებულებების დარღვევა საქართველოს ხელისუფლების მხრიდან [...] როდესაც პატიმრის უფლებები ირღვევა და ირღვევა ასე უხეშად, ჩვენ ვშუამდგომლობთ, რომ აღნიშნულ საკითხზე სასამართლომ მიიღოს გადაწყვეტილება და დაავალოს სასჯელაღსრულებით დაწესებულებას, განჩინებით და ასევე, პროკურატურას, ზედამხედველობა გაუწიოს ამ საკითხს, რომ მიხეილ სააკაშვილს გაეწიოს ადეკვატური სამედიცინო მომსახურება, ან მინიმუმ, შესწავლილი იქნეს მისი განცხადების საფუძვლიანობა და დასაბუთება", — განაცხადა გვარამიამ.

საპასუხოდ, პროკურორმა განაცხადა, რომ მათთვინ ბუნდოვანია, თუ რომელი მუხლებითა და რომელი საერთაშორისო კანონმდებლობით ხელმძღვანელობს დაცვის მხარე ამ შუამდგომლობის დაყენებისას.

"სიმართლე გითხრათ, ვერ მივხვდით, რომელი მუხლებით ხელმძღვანელობს დაცვის მხარე, როდესაც ამ შუამდგომლობას აყენებს. სასამართლომ დავალება რა ფორმით უნდა მისცეს პენიტენციურ სამსახურს, ისიც ვერ გავიგეთ, ვინაიდან, საპროცესო კანონმდებლობა არ ითვალისწინებს მოსამართლის მხრიდან ესეთ უფლებამოსილებას, რომ დავალება მისცეს პენიტენციურ სამსახურს. აქედან გამომდინარე, ვინაიდან ვერ გავიგეთ მოთხოვნა და დასაბუთება, და მათ შორის, თუნდაც რომელი საერთაშორისო კანონმდებლობით ხელმძღვანელობენ", — თქვა პროკურორმა.