ოცნების პრემიერმა, ირაკლი კობახიძემ "ბათუმელების" და "ნეტგაზეთის" დამფუძნებელს და დირექტორს, მზია ამაღლობელს ბრალი დასდო საქართველოს "ძალოვანი სტრუქტურების დაკნინების" დაკვეთის შესრულებაში. ამის შესახებ კობახიძემ ჟურნალისტებთან საუბრისას განაცხადა.

მისი თქმით, ამაღლობელის საპატიმროში ყოფნით "განაწყენებული არიან ის ადამიანები, რომლებიც ცდილობენ სახელმწიფოებრიობის დაკნინებას".

"მათ ჰქონდათ განზრახული საქართველოში ძალოვანი სტრუქტურების დაკნინება იმიტომ, რომ მათ ძალიან კარგად იციან, რომ თუ დაკნინდება ძალოვანი სტრუქტურები, დაკნინდება მთლიანად სახელმწიფო და, რა თქმა უნდა, მზია ამაღლობელმა ამ კუთხით შეასრულა კონკრეტული დაკვეთა. მას ჰქონდა მცდელობა დაეკნინებინა კონკრეტული ძალოვანი სტრუქტურები, დაეკნინებინა პოლიცია, თუმცა ამაზე მიიღო ზუსტად ის პასუხი, რა პასუხიც უნდა გაეცეს ასეთ ქმედებას სამართლებრივ სახელმწიფოში. ამით არიან განაწყენებული ის ადამიანები, რომლებიც ცდილობენ სახელმწიფოებრიობის დაკნინებას, რა თქმა უნდა ეს არ გავა, ჩვენ ბოლომდე დავიცავთ ჩვენი სახელმწიფოს ინტერესებს", — განაცხადა კობახიძემ ჟურნალისტებთან საუბრისას.

ეს ირაკლი კობახიძის მიერ მზია ამაღლობელზე პირველი თავდასხმა არ არის. 16 აპრილს ქართული ოცნების პრემიერმინისტრმა "რუსთავი 2"-ის ეთერშიც თქვა, რომ "მზია ამაღლობელი კონკრეტულ დაკვეთას ასრულებდა".

"მზია ამაღლობელი მსხვერპლი არ არის. ის კონკრეტულ დაკვეთას ასრულებდა და მისი დავალება იყო პოლიციის დაკნინება და ღირსების შეურაცხყოფა. საპატიმროებში მყოფთა დიდი ნაწილი კი პროპაგანდის მსხვერპლია".

მზია ამაღლობელის ადვოკატი მაია მწარიაშვილი აცხადებდა, რომ კობახიძე არღვევს მზია ამაღლობელის უდანაშაულობის პრეზუმფციას, რაც საქართველოს კონსტიტუციით გარანტირებული უფლებაა.

ამასთანავე, მწარიაშვილის თქმით, ოცნების პრემიერმინისტრისგან განსხვავებით, არც პროკურატურა ამბობს, რომ მზია მოქმედებდა დავალებითა და შეკვეთით. ეს არც ბრალდების დადგენილებაში წერია.