Reuters-ის ცნობით, OpenAI ვებბრაუზერის გამოშვებას აპირებს, რომელიც Google Chrome-სა და Safari-ს გაუწევს კონკურენციას. ახალი ბრაუზერი თითქმის მზადაა და მომდევნო კვირებში გახდება ხელმისაწვდომი.

OpenAI-ს ბრაუზერი ხელოვნური ინტელექტის დახმარებით იმუშავებს. ბრაუზერის მეშვეობით კომპანია ვებზე ძიების მონაცემებსაც მიიღებს — ინფორმაციას, რომლის წყალობითაც Google Chrome-მა ბრაუზერებში მოწინავე ადგილი შეინარჩუნა.

ცნობილია, რომ წარსულში OpenAI-მ გუგლს ძიების მონაცემები სთხოვა, რათა საკუთარ ჩატბოტში ძებნის ფუნქცია (SearchGPT) გაეუმჯობესებინა, თუმცა გუგლმა იუარა.

Google-ის მშობელი კომპანია, სახელად Alphabet, თავისი ბრაუზერიდან მიღებულ მონაცემებს იმისთვის იყენებს, რომ მომხმარებლებს უკეთ მორგებული რეკლამები შესთავაზოს. OpenAI-ს უკვე აქვს ძიების ფუნქცია SearchGPT; შესაბამისად, შემდეგი ლოგიკური ნაბიჯია ბრაუზერი, რომელშიც ეს ფუნქცია იქნება ინტეგრირებული.

ცნობილია, რომ OpenAI-ს ბრაუზერში ინტერაქციების ნაწილი ChatGPT-ს მსგავს ინტერფეისში შედგება, ანუ მომხმარებლებს ბრაუზერი სხვადასხვა ბმულზე არ გადაამისამართებს.

ბრაუზერში, შესაძლოა, OpenAI-ს სხვა პროდუქტებიც მოხვდეს. ეს შეიძლება იყოს, მაგალითად, Operator, რომელიც ბრაუზერს სხვადასხვა მოქმედების შესრულების საშუალებას მისცემს, იქნება ეს რაიმეს დაჯავშნა თუ განაცხადების შევსება.

ცნობისთვის, OpenAI ბრაუზერის შექმნის იდეაზე 2024 წელს ალაპარაკდა.