2025 წლის 10 ივლისს, რომში გამართულ უკრაინის აღდგენის კონფერენციაზე, ევროკომისიის პრეზიდენტმა ურსულა ფონ დერ ლაიენმა უკრაინის ომისშემდგომი აღდგენის მიზნით 2.3 მილიარდი ევროს დახმარების გამოყოფა დააანონსა. ამის შესახებ ინფორმაციას Reuters ავრცელებს.

ფინანსური პაკეტი 1.8 მილიარდი ევროს ოდენობის საგარანტიო სესხებს და 580 მილიონ ევროს გრანტებს მოიცავს. ეს თანხები ევროკავშირის საჯარო საფინანსო ინსტიტუტების მხრიდან გაიცემა. აღნიშნული მხარდაჭერა უკრაინის საინვესტიციო ჩარჩოს (Ukraine Investment Framework) ნაწილია, რომელიც მიზნად ისახავს ჯამში 10 მილიარდი ევროს ინვესტიციის მობილიზებას საცხოვრებლების, ენერგეტიკის, ჯანდაცვის და ბიზნესების აღსადგენად.

ფონ დერ ლაიენმა ასევე წარადგინა ახალი საინვესტიციო ფონდი, რომელიც ევროპის საინვესტიციო ბანკის და საფრანგეთის, გერმანიის, იტალიისა და პოლონეთის მხარდაჭერით შეიქმნა. ფონდში დასაწყისისთვის 220 მილიონი ევროა. მიზანი 2026 წლამდე 500 მილიონ ევროზე გასვლაა.