ადამიანის უფლებათა ევროპულმა სასამართლომ დეკანოზ გიორგი მამალაძის მიერ წარდგენილი მეორე საჩივარი დაუშვებლად გამოაცხადა. ინფორმაციას ოცნების ხელისუფლების იუსტიციის სამინისტრო ავრცელებს.

საჩივარი ეხებოდა მისი და ადვოკატს შორის სატელეფონო კომუნიკაციაზე შესაძლო ფარულ მიყურადებას, რაც მამალაძის მტკიცებით, ზღუდავდა მის უფლებას ევროპულ სასამართლოში საჩივრის თავისუფლად წარდგენაზე.

სტრასბურგის სასამართლოს განცხადებით, არ არსებობს მტკიცებულება კომუნიკაციის მიყურადების შესახებ, ხოლო მომჩივანმა შეუფერხებლად შეძლო საჩივრის წარდგენა და მასალების გაგზავნა.

შესაბამისად, სასამართლომ საჩივარი მიიჩნია დაუსაბუთებლად და იუსტიციის სამინისტროს პოზიცია გაიზიარა.

დეკანოზ გიორგი მამალაძის პირველი საჩივარი შეეხებოდა ე.წ "ციანიდის საქმეს". მან ამ საჩივრით ადამიანის უფლებათა ევროპულ სასამართლოს მიმართა, რათა დაედგინა, დაირღვა თუ არა მისი სამართლიანი სასამართლოს უფლება — განსაკუთრებით, ნატრიუმის ციანიდის მოპოვების გარემოებებისა და მტკიცებულებების სანდოობის კუთხით.

თუმცა, 2022 წლის 3 ნოემბერს სტრასბურგის სასამართლომ მიიღო გადაწყვეტილება და მიიჩნია, რომ საქართველოს სასამართლოს არ დაურღვევია გიორგი მამალაძის უფლებები და მის საქმეში სამართლიანი სასამართლოს უფლება არ იყო დარღვეული.

გიორგი მამალაძე 7 წლიანი პატიმრობის შემდეგ, ვადაზე ადრე, 2024 წლის 14 თებერვალს გაათავისუფლეს. საპატიმროდან გამოსვლის შემდეგ გიორგი მამალაძის ძმამ, თორნიკე მამალაძემ, განაცხადა, რომ მას შემდეგ, რაც იგი საკუთარ ჯანმრთელობის მდგომარეობას მოაგვარებდა, საზოგადოება გაიგებდა ვინ იდგა ამ ყველაფრის უკან.

ამავე თემაზე იხილეთ: