ოცნების ლიდერებმა — ირაკლი კობახიძემ, შალვა პაპუაშვილმა და კახა კალაძემ კომენტარი გააკეთეს აჭარის ავტონომიური რესპუბლიკის ყოფილი თავმჯდომარის, თორნიკე რიჟვაძის ჯანმრთელობის მდგომარეობასა და მის სავარაუდო წერილში ნახსენებ ბრალდებებზე.

ქართული ოცნების პრემიერმინისტრმა, ირაკლი კობახიძემ აღნიშნა, რომ რიჟვაძეს არავინ არაფერს აბრალებდა და მის მიმართ პრეტენზია არავის ჰქონია.

"ჩვენ თორნიკე რიჟვაძეს არაფერს ვაბრალებდით. სრული პასუხისმგებლობით შემიძლია გითხრათ, რომ არავის თორნიკე რიჟვაძის მიმართ არავითარი პრეტენზია არ აქვს. რაც შეეხება ბრალდებებს, საჯარო მაგალითი გითხარით, ვინ აბრალებდა თორნიკე რიჟვაძეს მფარველობას კანონიერი ქურდების თუ არ ვიცი, როგორ იყო. ვიმეორებ, მე და ჩემს მეგობრებს არავითარი პრეტენზიები არ გვაქვს თორნიკე რიჟვაძის მიმართ. მასთან ძალიან კარგი ურთიერთობა მქონდა, მათ შორის მას შემდეგაც, რაც მან დატოვა თანამდებობა. რამდენიმე შეხვედრა მქონდა. ყოველ ჯერზე, ძალიან თბილი შეხვედრები. რაც შეეხება როტაციას, ეს არის ჩვეულებრივი ამბავი, მით უმეტეს, როცა კონკრეტული ადამიანი ტოვებს თანამდებობას, იქ როტაციის განხორციელება არის ჩვეულებრივი", — განაცხადა ირაკლი კობახიძემ.

ოცნების პარლამენტის თავმჯდომარეს, შალვა პაპუაშვილს კითხვა დაუსვეს თორნიკე რიჟვაძის მისამართით გაჟღერებულ კორუფციასა და ბარიგების მფარველობის ბრალდებებზე.

"მოტივაციებზე მე ვერ გეტყვით, თავად ბატონმა თორნიკემ უნდა თქვას. ადამიანი სიკვდილს ებრძოდა. ნახეთ თქვენ და თურქეთშია გადაყვანილი სამკურნალო", — განაცხადა პაპუაშვილმა.

ჟურნალისტის კითხვაზე, რატომ არ მოინახულა მან რიჟვაძე კლინიკაში, პაპუაშვილმა უპასუხა, რომ "მძიმე მდგომარეობაში იყო და ფიზიკურად ვერ მოინახულებდა.

"პრემიერმინისტრი იყო [თორნიკე რიჟვაძის მოსანახულებლად]. იყო მძიმე მდგომარეობაში. ფიზიკურად ვერ მოინახულებდი ადამიანს, ვინაიდან რეანიმაციულ განყოფილებაში იყო და იცით, როგორც კი დაიწყო გაუმჯობესების დინამიკა, ოჯახის სურვილით ის გადაყვანილია თურქეთში.

...ოჯახს აქვს სურვილი და, რა თქმა უნდა, მნიშვნელოვანია ამ დროს, რომ ოჯახის გადმოსახედიდან, როგორც ისინი ხედავენ ოჯახის წევრის მდგომარეობას, ისე წავიდეს მისი მკურნალობაც. იმიტომ, რომ ეს ოჯახის პასუხისმგებლობაც არის", — თქვა პაპუაშვილმა.

ქალაქის მერმა, კახა კალაძემ აღნიშნა, რომ "ყველაზე მთავარი და მნიშვნელოვანი თორნიკეს ჯანმრთელობაა.

"ყველაზე მთავარი და მნიშვნელოვანი დღეს არის თორნიკეს ჯანმრთელობა. მინდა, მალე გამოჯანმრთელება ვუსურვო მას. დანარჩენს ვერაფერს გეტყვით, არანაირი ინფორმაცია არ მაქვს. კომენტარს რაც შეეხება, გუშინ დავბრუნდი საქართველოში. მინდა, თორნიკეს მალე გამოჯანმრთელება ვუსურვო და წარმატებები ყველაფერში", — განაცხადა კახა კალაძემ თორნიკე რიჟვაძის შესახებ.

ცნობისთვის, შსს-ს ცნობით, 2025 წლის 7 ივლისს, საგარეჯოს "ჯეოჰოსპიტალსში", შეყვანილი იქნა აჭარის ავტონომიური რესპუბლიკის მთავრობის ყოფილი თავმჯდომარე თორნიკე რიჟვაძე, რომელსაც გულმკერდის არეში ცეცხლნასროლი ჭრილობა აღენიშნებოდა.

შინაგან საქმეთა სამინისტროში გამოძიება სისხლის სამართლის კოდექსის 115-ე მუხლით არის დაწყებული, რაც თვითმკვლელობამდე მიყვანას გულისხმობს. ფაქტთან დაკავშირებით მიმდინარეობს ინტენსიური საგამოძიებო მოქმედებები.

მოგვიანებით, თორნიკე რიჟვაძე საგარეჯოს "ჯეოჰოსპიტალსიდან", თბილისში, პირველ საუნივერსიტეტო კლინიკაში გადმოიყვანეს.

9 ივნისს, თორნიკე რიჟვაძე სამკურნალოდ თურქეთში გადაიყვანეს.