სომხეთის პრემიერმინისტრი ნიკოლ ფაშინიანი და აზერბაიჯანის რესპუბლიკის პრეზიდენტი ილჰამ ალიევი ერთმანეთს აბუ დაბიში შეხვდნენ და სომხეთსა და აზერბაიჯანს შორის სახელმწიფოებრივი ურთიერთობების ნორმალიზაციის დღის წესრიგის სხვადასხვა ასპექტი განიხილეს. ამის შესახებ ინფორმაციას სომხეთის საგარეო საქმეთა სამინისტრო ოფიციალურ ვებგვერდზე აქვეყნებს.

დადასტურდა, რომ ორმხრივი მოლაპარაკებები წარმოადგენს ყველაზე ეფექტურ ფორმატს ნორმალიზაციის პროცესთან დაკავშირებული ყველა საკითხის განსახილველად, რის საფუძველზეც შედეგზე ორიენტირებული დიალოგის გაგრძელების გადაწყვეტილება იქნა მიღებული.

მხარეებმა, საზღვრის დელიმიტაციის პროცესში მიღწეული პროგრესის აღნიშვნით, შესაბამის სახელმწიფო კომისიებს დაავალეს გააგრძელონ პრაქტიკული მუშაობა ამ მიმართულებით.

ასევე, მხარეები შეთანხმდნენ, რომ ორმხრივი მოლაპარაკებები და ნდობის განმტკიცების ზომები ორ ქვეყანას შორის გაგრძელდება.

სომხეთის რესპუბლიკის პრემიერმინისტრმა და აზერბაიჯანის რესპუბლიკის პრეზიდენტმა მადლობა გადაუხადეს არაბთა გაერთიანებული ემირატების პრეზიდენტს, შეიხ მოჰამედ ბინ ზაიდ ალ ნაჰიანს, თბილი მასპინძლობისა და ორმხრივი შეხვედრის ორგანიზებისთვის.