სანქცირებულმა მოსამართლემ, თამარ მჭედლიშვილმა 19 წლის საბა ჯიქიას 4 წლით და 6 თვით თავისუფლების აღკვეთა მიუსაჯა. 19 წლის ახალგაზრდას პროევროპულ აქციებზე გდდ-ს თანამშრომლისთვის, ბექა გოტიაშვილისთვის ფეხის დარტყმას ედავებოდნენ. ჯიქიას ბრალი სისხლის სამართლის კოდექსის 353-ე პრიმა მუხლით ჰქონდა წარდგენილი, რაც 4-დან 7 წლამდე პატიმრობას ითვალისწინებს. საბა ჯიქიას განაჩენს საქმის პროკურორი თამარ იაკობიძე არ ესწრებოდა — ის შვებულებაში იმყოფებოდა. დღევანდელ სხდომაზე მის ნაცვლად როინ ხინთიბიძე მივიდა.

საქმეში "დაზარალებულმა" ბექა გოგიტაშვილმა სასამართლო პროცესზე განაცხადა, რომ მას ამ "დარტყმისგან" დაზიანება არ მიუღია. დაცვის მხარემ გოგიტაშვილს ამავე სასამართლო სხდომაზე ჰკითხა პროევროპული აქციის მონაწილეებს არბევდა თუ არა, რაზეც გოგიტაშვილმა უპასუხა, რომ "გააჩნია გააჩნია დარბევაში რას გულისხმობთ, ჩემი შეხედულებით, აქციის მონაწილეები არასდროს დამირბევია".

სანამ მოსამართლე თამარ მჭედლიშვილი განაჩენის გამოსატანად სასამართლო დარბაზიდან გავიდოდა, საბა ჯიქიამ სიტყვით მიმართა დარბაზს:

“მეგობრებო, უღრმესი მადლობა გულშემატკივრობისთვის. მოტივაციაა ეს და იმის შეხსენება, რომ მარტო არ ვარ.

რთულია იმის ყურება, როგორ ცდილობენ, იძალადონ თქვენზე ყველანაირი მეთოდით, როგორ ცდილობენ, ჩაახშონ თავისუფალი აზრი, თუმცა ბევრ თავისუფალ აზრს ვხედავ, ვხედავ, როგორ იცავთ ერთმანეთს და ეს მაძლევს იმედს, რომ რაღაც იქნება...

...შინაგანი შიში მაინც მაწუხებს. მე მეშინია დამარცხების, რადგან არ მინდა მომავალმა თაობებმა ამ მარცხის გამო გამკიცხონ.

არ მინდა რომ დავმარცხდეთ, რადგან არ მინდა რომ ჩვენი თაობა და მომავალი თაობა უსამართლო ქვეყანაში და დიქტატურაში გაიზარდოს.

მე მზად ვარ, მხნედ ვარ და მინდა რომ თქვენც ასე იყოთ.

ახალგაზრდული წლების ციხეში გატარება მიწევს... ახალი ძმები შევძინე, გავიგე თავისუფლების ფასი. შვილიშვილებისთვის მექნება მაგარი ისტორიები მოსაყოლი. ცრემლებს ვხედავ თქვენს თვალებზე და არ მსიამოვნებს,” — განაცხადა საბა ჯიქიამ. (ტექსტი “პუბლიკა”)

შემდეგ მოსამართლე მჭედლიშვილი სასამართლო პროცესიდან გადის და იღებს გადაწყვეტილებას 19 წლის ახალგაზრდას 4,5-წლიანი პატიმრობა მიუსაჯოს. რადიო თავისუფლების სასამართლოს ლაივბლოგში ვკითხულობთ:

"მოსამართლე თამარ მჭედლიშვილი სათათბიროდ გავიდა. ტირის დარბაზი, ტირის დედა, ტირიან მეგობრები. საბა ჯიქია იღიმის და სთხოვს, არ ინერვიულონ"

სასამართლოს განაჩენის შემდეგ ადვოკატი გუჯა ავსაჯანიშვილი მედიასთან კომენტარს აკეთებს. მისი თქმით მჭედლიშვილმა დღეს დაამტკიცა, რამდენად შეუძლია თუ არა გადაწყვეტილების დამოუკიდებლად მიღება. ადვოკატის განცხადებით მოსამართლეს უკვე წინასწარ ჰქონდა გადაწყვეტილება მიღებული ჯიქიას საქმეზე, რადგან იმ დროში, რაც ის სათათბიროდ გასული იყო ტექსტის დაწერასაც ვერ მოასწრებდა, რაც სასამართლო დარბაზში განაჩენის გამოცხადებისას ამოიკითხა.

ავსაჯანიშვილის განცხადებით მოსამართლემ საქმის განხილვისას ჰაბიდოსკოპიური ექსპერტიზის ჩატარებაზე და მოწმეების დაკითხვა საჭიროდ არ ჩათვალა და ამით დღევანდელ პროცესზე "სისხლის სამართლის საპროცესო კოდექსი გააუქმა".

"დღევანდელი პროცესი იყო იმის წყალგამყოფი თამარ მჭედლიშვილს შეუძლია თუ არა გადაწყვეტილება მიიღოს დამოუკიდებლად. ჩვენ ვნახეთ რომ ის გავიდა სათათბიროდ და მე განზრახ ვამოწმებდი, რასაც კითხულობდა იმ ტექსტის წაკითხვას, სათათბიროდ გასვლას და ამ ტექსტის დაწერას რამდენი დრო დაჭირდებოდა. ჩვენ ვნახეთ, რომ თამარ მჭედლიშვილის წაკითხული ტექსტის განმარტებას უფრო მეტი დრო დასჭირდებოდა ვიდრე სათათბირო ოთახში გასვლას. ეს იმას ნიშნავს, პირდაპირ, რომ ქალბატონი თამარი საბოლოო სიტყვამდე უკვე დაწერილი განაჩენით მოვიდა. ეს იმას ნიშნავს, რომ მოსამართლეები უკვე წინასწარი განწყობით ჩამოდიან პირველივე პროცესზე. მეორე, ქალბატონმა თამარმა თქვა, რომ ჰაბიდოსკოპიური ექსპერტიზა საერთოდ არ სჭირდება და ქალბატონმა თამარმა ასევე განმარტა ის, რომ თუ მთავარ გამომძიებელს დავკითხავთ საქმეზე დანარჩენი მოწმეების დაკითხვა საერთოდ საჭირო არ იქნება, რაც არის კანონის სრული დარღვევა და სისხლის სამართლის 2 კურსელი სტუდენტიც მიხვდება ამას, რომ დღეს, ქალბატონმა თამარმა გააუქმა სისხლის სამართლის საპროცესო კოდექსი დარბაზში," — განაცხადა ადვოკატმა.

ამ დროისთვის პროევროპულ აქციებში მონაწილეობისთვის დაკავებულ 3 პირს — მათე დევიძეს, გიორგი მინდაძეს და საბა ჯიქიას თავისუფლების აღკვეთა მიესაჯა. სამივე ბრალდებულს სისხლის სამართლის კოდექსის 353-ე პრიმა მუხლით ედავებოდნენ, რაც პოლიციელზე თავდასხმას გულისხმობს და 4-დან 7 წლამდე პატიმრობას ითვალისწინებს. მათე დევიძეს 4 წელი და 6 თვე მიესაჯა, ხოლო მინდაძეს — 5 წელი.