10 ივლისს, კომუნიკაციების კომისიამ პარტია "ქართული ოცნების" საჩივრის საფუძელზე ტელეკომპანია "პირველი", "ფორმულა" და "მთავარი" სამართალდამრღვევებად ცნო, მაგრამ არ დაუწესა ფინანსური ჯარიმები.

Comcom-ის მიხედვით, "პირველმა", "ფორმულამ" და "მთავარმა" ახალი ამბები მიუკერძოებლობის სტანდარტის დარღვევით მიაწოდეს.

"ოცნება" საჩივარში მიუთითებდა, რომ ტელეკომპანიების მიერ ახალი ამბების გაშუქებისას არ გაიმიჯნა საკუთარი მოსაზრება და რეალური ფაქტი, კომუნიკაციების კომისიამ საჩივარში არსებული ეს ნაწილი შეუსაბამისოდ მიიჩნია, რადგან "მაუწყებლობის შესახებ" საქართველოს კანონის 54-ე მუხლის მე-5 მუხლზე დაყრდნობით, აკრძალულია მაუწყებლის მიერ "ახალი ამბებისა და საზოგადოებრივ-პოლიტიკურ პროგრამაში რომელიმე პოლიტიკური პარტიის, საზოგადოებრივი რელიგიური გაერთიანების ან სხვა ინტერესთა ჯგუფის მხარდამჭერი ან საწინააღმდეგო პოზიციის გამოხატვა საერთოდ აკრძალულია".

შესაბამისად კანონი ვერ დაირღვეოდა.

"შესწავლილ გარემოებებზე დაყრდნობით, კომუნიკაციების კომისიამ დაადგინა, რომ მაუწყებლების მხრიდან დარღვეული იყო "მაუწყებლობის შესახებ" საქართველოს კანონის 54-ე მუხლის მე-5 პუნქტისა და 59 მუხლის მე-5 პუნქტის მოთხოვნები. დარღვევის დადასტურების შემთხვევაში, კომუნიკაციების კომისია უფლებამოსილია, მაუწყებლებს შეუფარდოს კანონით გათვალისწინებული სანქცია, თუმცა, იმის გათვალისწინებით, რომ დარღვევა ჩადენილ იქნა „მაუწყებლობის შესახებ“ საქართველოს კანონის 76 4 მუხლით განსაზღვრულ გარდამავალპერიოდში, ასევე, კომისიამ მხედველობაში მიიღო ის გარემოებაც, რომ მას აქამდე არ უმსჯელია მაუწყებლის მიუკერძოებლობის სტანდარტებზე, ასევე, არ შეუფასებია მაუწყებლის მიერ ახალი ამბების პროგრამაში მიუკერძოებლობის დაცვისა და საკუთარი მოსაზრების გამოხატვის აკრძალვის მოთხოვნები, ამ გარემოებათა ერთობლიობის საფუძველზე ComCom-მა მაუწყებლები სამართალდამრღვევებად ცნო, მაგრამ ადმინისტრაციული ნ პასუხისმგებლობისგან გაათავისუფლა".

"შემიძლია დაგპირდეთ, რომ კანონის აღსრულების ნაწილში, მაქსიმალურად ლოიალურები ვიქნებით, განსაკუთრებით იქამდე, ვიდრე პრაქტიკა დაინერგება. ჩვენ დაინტერესებული ვართ ისევე, როგორც საზოგადოება და თქვენც, რომ დეზინფორმაცია არ ვრცელდებოდეს და შეცდომაში არ იქნეს შეყვანილი ჩვენი საზოგადოება, ასევე არ მოხდეს ფაქტი არასწორად," — განაცხადა კომუნიკაციის კომისიების გასულ სხდომაზე კომისიის თავმჯდომარემ კახა ბექაურმა.