პრეზიდენტი, სალომე ზურაბიშვილი ნაციონალური მოძრაობის გადაწყვეტილებას, შეუერთდეს საპარლამენტო საქმიანობას, მიესალმება. ამის შესახებ პრეზიდენტის ადმინისტრაციის განცხადებშია ნათქვამი.

"დემოკრატიული პროცესისათვის აუცილებელია ყველა პოლიტიკურმა პარტიამ პატივი სცეს საკუთარი ამომრჩევლის ნებას და გამოიყენოს ის ნდობა და მანდატი, რომელიც მინიჭებული აქვს არჩევნების საფუძველზე. პრეზიდენტის მიერ ინიცირებული პროცესი, რომელიც მიზნად ისახავს პოლარიზაციის დაძლევას, ასევე მოითხოვს, რომ პარლამენტში სრულად იყოს ათვისებული პოლიტიკური დებატების, დიალოგისა და დისკუსიის სივრცე. ეს არის ჩვენი ქვეყნის განვითარების გზა", — ვკითხულობთ განცხადებაში.

ენმ-ის მიერ საპარლამენტო ბოიკოტის შეწყვეტის შესახებ მიღებულ გადაწყვეტილებაზე დღეს, 31 იანვარს პარტიის ერთ-ერთმა ლიდერმა, ხატია დეკანოიძემ განაცხადა. მისივე თქმით, ფრაქციის საპარლამენტო საქმიანობის ერთ-ერთი ძირითადი ღერძი მიხეილ სააკაშვილის საკითხი იქნება.