ფრაქცია ერთიანი ნაციონალური მოძრაობა საპარლამენტო ბოიკოტს წყვეტს და საპარლამენტო საგაზაფხულო სესიაში ჩაერთვება. ამის შესახებ განცხადება პარტიის ერთ-ერთმა ლიდერმა, ხატია დეკანოიძემ გააკეთა.

"შაბათს შეხვედრაზე ჩვენ მივიღეთ გადაწყვეტილება, რომ ფრაქცია ერთიანი ნაციონალური მოძრაობა — ძალა ერთობაშია საპარლამენტო საგაზაფხულო სესიაში ჩაერთვება, შეწყვეტს ბოიკოტს, მაგრამ აქვე მინდა ხაზი გავუსვა და ავხსნა ის მიზეზები, თუ რატომ მიიღო ჩვენმა ფრაქციამ ეს გადაწყვეტილება. პირველ რიგში, მოგეხსენებათ, რომ ჩვენი პარტია და ზოგადად, ქვეყანა არის უმძიმესი რეალობის და გამოწვევის წინაშე. საქმე ეხება იმას, რომ საქართველოს მესამე პრეზიდენტი მიხეილ სააკაშვილი არის საპყრობილეში დატყვევებული რეჟიმის მიერ. მიგვაჩნია არამხოლოდ ჩვენ, არამედ საერთაშორისო საზოგადოება არის ამაზე ჩამოყალიბებული, მისი საპყრობილეში ყოფნა არის, რა თქმა უნდა, რეჟიმის პოლიტიკური შურისძიება და ბიძინა ივანიშვილის პოლიტიკური შურისძიება", — განაცხადა დეკანოიძემ.

მისივე თქმით, ფრაქციის საპარლამენტო საქმიანობის ერთ-ერთი ძირითადი ღერძი იქნება მიხეილ სააკაშვილის საკითხი.

"ამიტომ ჩვენი საპარლამენტო საქმიანობის ერთ-ერთი ძირითადი ღერძი, რა თქმა უნდა, იქნება საჯარო მხილება რეჟიმის, თუ როგორ ეპყრობა რეპრესიული ინსტიტუტების გამოყენებით მიხეილ სააკაშვილს რეჟიმი, თუ როგორ მოექცა მას რეჟიმი და სახელმწიფო ინსტიტუტები არაერთხელ და სწორედ ამისთვის თქვენ იცით, რომ ჩვენ ვაპირებთ საგამოძიებო კომისიის დარეგისტრირებას. დღესვე დარეგისტრირდება ეს საგამოძიებო კომისია", — ამბობს ენმ-ის ერთ-ერთი ლიდერი.

ნაციონალური მოძრაობის თავმჯდომარემ, ნიკა მელიამ 13 იანვარს განაცხადა, რომ პარტია ძალიან ახლოსაა იმ გადაწყვეტილებამდე, რომ პარლამენტში შევიდნენ, თუმცა აქვე ამბობს, რომ არასერიოზული იქნება, თუ მხოლოდ საგამოძიებო კომისიების შესაქმნელად შევლენ. მელიას აზრით, მათ უნდა იბრძოლონ და ბრძოლის ყველა ასპარეზი აითვისონ.

პარლამენტის საგაზაფხულო სესია ხვალ. პირველ თებერვალს იხსნება.