საგარეო საქმეთა მინისტრი, დავით ზალკალიანი ჩამოთვლის იმ განცხადებებს და საერთაშორისო შეხვედრებს, სადაც, მისივე მტკიცებით, ღიად დააფიქსირა უკრაინის მხარდაჭერა. პარტნიორი ქვეყნის მიმართ არასაკმარისი სოლიდარობისთვის კრიტიკის საპასუხო არგუმენტების ჩამოთვლას მინისტრი ჯერ კიდევ გასული წლის აგვისტოში გამართული ყირიმის პლატფორმიდან იწყებს. მისი თქმით, ამ პლატფორმაში საქართველოს მონაწილეობა "უძლიერესი პოლიტიკური ნაბიჯი" იყო.

ზალკალიანმა გაიხსენა ასოცირებული ტრიოს ფარგლებში, საქართველოს, უკრაინისა და მოლდოვის პრემიერმინისტრების ვიზიტი ბრიუსელში; აღმოსავლეთ პარტნიორობის სამიტი და სხვა საერთაშორისო დონის ფორმატები, სადაც უკრაინის ხელისუფლების წარმომადგენლებთან ერთად მონაწილეობდა.

"რამდენიმე დღეა რაც დავბრუნდი ბრიუსელიდან, სადაც, უკრაინის წარმომადგენლებთან ერთად NATO-ს გაფართოებულ ფორმატებში მივიღე მონაწილეობა დებატებში, სადაც ღიად დავაფიქსირე ჩემი მხარდაჭერა. ამის შემდეგ ჩემი საჯარო განცხადებები.

ასევე, ორიოდე დღის წინ ზარი, რომელიც განხორციელდა ჩემს კოლეგა, უკრაინის საგარეო საქმეთა მინისტრ კულებასთან. ეს რაც ოფიციალური ნაწილია, თორემ, არაოფიციალურად, მუდმივად, ყოველდღიურად, ახლა მე ჩემს უკრაინელ კოლეგას ვესაუბრები რამდენჯერმე და ეს მხარდაჭერა მათთვის არის ნათელი", — განაცხადა დავით ზალკალიანმა პალიტრანიუსის ეთერში.

მინისტრის მტკიცებით, უკრაინელებს არ აქვთ განცდა, რომ საქართველოსგან სოლიდარობა აკლიათ.

იმ პირობებში, როცა უკრაინა ომის ზღვარზეა და რუსეთის სავარაუდო სამხედრო ინტერვენციის საპასუხოდ ემზადება, საქართველოს ხელისუფლებას როგორც ქვეყნის შიგნით, ისე მის საზღვრებს გარეთ პარტნიორი ქვეყნის მიმართ არასაკმარის სოლიდარობაში ადანაშაულებენ. ამის პარალელურად, ქართულმა ოცნებამ უკრაინის მხარდამჭერი რეზოლუცია შეიმუშავა, თუმცა მასში რუსეთი ნახსენები არ არის. რუსეთის აგრესიის აღნიშვნისა და დაგმობის გარეშე გაავრცელა კიევის მხარდამჭერი მიმართვა თბილისის საკრებულომაც.

გაიგე მეტი: