თბილისში მომხდარი სროლის შესახებ, რომელსაც ერთი ადამიანის სიცოცხლე ემსხვერპლა, შსს აცხადებს, რომ დაკავებულია მოკლულის მამა, რომელიც წარსულშიც იყო ნასამართლევი. შემთხვევა გუშინ, 10 აპრილის საღამოს მოხდა.

გამოძიება ოჯახში კონფლიქტის ნიადაგზე ჩადენილი განზრახ მკვლელობისა და ცეცხლსასროლი იარაღის მართლსაწინააღმდეგო შეძენა-შენახვის მუხლებით მიმდინარეობს.

შსს-ს განცხადებით, საგამოძიებო მოქმედებების დროს გამოკითხულმა პირებმა პოლიციას განუცხადეს, რომ ნოდარ შ.-მ შვილთან - 1993 წელს დაბადებულ მიხეილ შ.-სთან ურთიერთშელაპარაკებისას სახლის ეზოსა და ქუჩაში სროლა დაიწყო.

შსს-ცნობით, ის ფაქტი, რომ მიხეილ შ.-ს მამამისის იარაღიდან ესროლეს ფეხში, პოლიციას გამოკითხულმა პირებმა დაუმალეს. უწყება აღნიშნავს იმასაც, რომ აღნიშნულის შესახებ დუმდა თავად დაჭრილიც, გარეგნულად კი მას დაზიანება არ აღენიშნებოდა, ხოლო ეზოში და მიმდებარე ტერიტორიაზე სისხლის კვალი არ იყო.

სამინისტროს განცხადებით, მიხეილ შ.-ს მეუღლემ, 1997 წელს დაბადებულმა მარიამ ტ.-მ მოგვიანებით პოლიციისთვის მიცემულ ჩვენებაში განაცხადა, რომ დაჭრის ფაქტი მან თავდაპირველად პოლიციას მეუღლის კატეგორიული მოთხოვნით დაუმალა, თუმცა, როდესაც მან შენიშნა, რომ მისი მეუღლე შეუძლოდ გახდა, პოლიციას სიმართლე გაუმხილა და დახმარება ითხოვა.

შსს-ს განმარტებით, მიუხედავად ჩატარებული სამედიცინო ღონისძიებებისა, მიხეილ შ. საავადმყოფოში მიყვანიდან, დაახლოებით, ერთ საათში გარდაიცვალა. მისი გარდაცვალების უშუალო მიზეზის დასადგენად დანიშნულია სასამართლო-სამედიცინო ექსპერტიზა.