კიევის სასამართლოს გადაწყვეტილებით, უკრაინის ექსპრეზიდენტ პეტრო პოროშენკოს არ დააკავებენ. სასამართლომ პოროშენკო პირადი პასუხისმგებლობით გაათავისუფლა და საზღვარგარეთ გასამგზავრებელი პასპორტის ჩაბარება დაავალა. ინფორმაციას უკრაინული მედია ავრცელებს.

ბრალდების მხარე პოროშენკოს პატიმრობას ან გირაოს სახით ერთ მილიარდ გრივნას ითხოვდა. სასამართლომ არცერთი შუამდგომლობა არ დააკმაყოფილა.

პეტრო პოროშენკო უკრაინაში 17 იანვარს ჩავიდა. ქვეყანაში დაბრუნების შესახებ მან 15 იანვარს ვიდეო მიმართვაში ისაუბრა. პოროშენკოს თქმით, ამას უკრაინის რუსეთის აგრესიისგან დასაცავად აკეთებს. მისი განცხადებით, დასავლეთში ყველა ფიქრობს, რომ დღეს რუსეთის მხრიდან საფრთხე უფრო ძლიერია, ვიდრე ბოლო 30 წლის განმავლობაში, თუმცა ეს არ ესმის უკრაინის პრეზიდენტს. პოროშენკო ამბობს, რომ მზადაა, დაეხმაროს ხელისუფლებას.

2021 წლის 17 დეკემბერს გამოძიების სახელმწიფო ბიუროში განაცხადეს, რომ პოროშენკომ უგულებელყო გამომძიებლები, რომლებიც ცდილობდნენ მის გამოძახებას დანაშაულებრივი სქემის საქმეზე. იმავე დღეს ცნობილი გახდა, რომ ყოფილი პრეზიდენტი ქვეყნიდან გაემგზავრა. 20 დეკემბერს, იმის გამო, რომ შეტყობინება პირადად ვერ მიაწოდეს, ის გაგზავნეს საცხოვრებელ, ასევე, რეგისტრაციის მისამართზე და სამუშაო ადგილას. 6 იანვარს პოროშენკოს ქონება დააყადაღეს.

უკრაინის ყოფილი პრეზიდენტი ქვეყნის ოკუპირებული ტერიტორიებიდან ნახშირის მიწოდების დანაშაულებრივი სქემის საქმეშია ბრალდებული. მას ტერორიზმის დაფინანსებაში, ტერორისტული ორგანიზაციის შექმნაში და სახელმწიფო ღალატში ადანაშაულებენ. კონკრეტულად მას ბრალი ედება იმაში, რომ წინასწარი შეთანხმებით, გარკვეულ პირებთან, მათ შორის რუსეთის მაღალჩინოსნების წარმომადგენლებთან ერთად ხელი შეუწყო ტერორისტული ორგანიზაციების, ლუგანსკის სახალხო რესპუბლიკისა და დონეცკის სახალხო რესპუბლიკის საქმიანობას. ორივე თვითგამოცხადებული რესპუბლიკაა, რომელიც ოკუპირებულია რუსეთის მიერ.