ცესკოს თავმჯდომარეობის კანდიდატი, გიორგი შაიშმელაშვილი პარალელს ავლებს საარჩევნო ადმინისტრაციის თანამშრომელთა და მედიის წარმომადგენელთა "გადაცდომებზე". კონკრეტულად, ის აცხადებს, რომ საარჩევნო ადმინისტრაციის შეცდომები მაშინვე განკითხვის საგანი ხდება, მედიის შეცდომებს კი მალე ივიწყებენ.

"სამწუხაროდ, ხდება ისე, რომ თვითონ ადმინისტრაციის მუშაობას, ნებისმიერ დონეზე ფაქტობრივად — ნუ, უბრალოდ საუბნო დონეზე ეს მეტად ჩანს, იმიტომ, რომ საოლქო და ცესკო მაინც მეტად, შედარებით პროფესიული კადრებით არის დაკომპლექტებული და საუბნოზე უფრო ხშირად არის ახალბედა კადრები და უფრო მათ მოსდით მეტად გადაცდომები და მცირე ხარვეზები — პატარა შეცდომაც ხდება ხოლმე განკითხვის საგანი და დისციპლინური პასუხისმგებლობის საფუძველი, თუმცა საინტერესოა რომ იგივე მედიის გადაცდომები, მაგალითად, ხდება ხოლმე დავიწყებადი და ყოველ ახალ არჩევნებზე განახლებადი.

მე ვისურვებდი, რომ შეიქმნას სტანდარტი, სადაც პასუხი მოეთხოვოთ მედიასაშუალებებს არასწორი ინფორმაციის გავრცელებაზე ან თვითონ, აკრძალული ფაქტის გაშუქებაზე და ა.შ.", — განაცხადა შაიშმელაშვილმა.

გიორგი შაიშმელაშვილის გარდა ცესკოს თავმჯდომარის კონკურსში კიდევ სამი კანდიდატი მონაწილეობს: თამაზ ფოლადაშვილი, თენგიზ თევზაძე და მოქმედი თავმჯდომარე, გიორგი კალანდარიშვილი.

ცესკოს თავმჯდომარისა და ცესკოს ორი წევრის თანამდებობაზე კანდიდატთა შესარჩევად კონკურსი 28 დეკემბერს გამოცხადდა. ამის შესახებ განკარგულება საქართველოს პრეზიდენტმა გამოსცა. ცესკოს მოქმედ თავმჯდომარესა და ცესკოს ორ წევრს უფლებამოსილების ვადა თებერვალში გასდით.

17 დეკემბერს საქართველოს პარლამენტმა დაჩქარებული წესით, მესამე მოსმენით რეგლამენტში ცვლილების შეტანის შესახებ კანონპროექტი დაამტკიცა, რომლის მიხედვითაც, ცესკოს თავმჯდომარისა და წევრების არჩევის წესი შეიცვალა. უფრო ზუსტად, გამარტივდა არჩევის პროცედურა.