ბიზნესმენისა და TV პირველის მფლობელის მამის, ავთანდილ წერეთლის განცხადებით, სამი წლის შემდეგ გაირკვა, რომ ფულის გათეთრებაში მონაწილეობა არ მიუღია. მისი თქმით, ახლა თაღლითობას ედავებიან, რაც ფულის გათეთრების მსგავსად, "თავზე დაემხობათ".

"თურმე, ფულის გათეთრებაში არ მიმიღია მონაწილეობა და ვყოფილვარ თაღლითი. დღეს გაირკვა, სამი წლის შემდეგ. სამი წელი რას იძიებდა პროკურატურა, არ ვიცი. თავზე დაემხოთ სულყველაფერი, ეს ფულის გათეთრებასთან დაკავშირებით და ასევე დაემხობათ თავზე ეს თაღლითობა. რა თაღლითობა, რის თაღლითობა? მამუკა ხაზარაძეა თაღლითი, ბადრი ჯაფარიძე თუ მე ვარ თაღლითი? რაში ვართ თაღლითები?", — თქვა წერეთელმა ფორმულასთან.

მოსამართლე გიორგი არევაძემ ე.წ. ფულის გათეთრების საქმის განაჩენი გამოაცხადა. მან ბადრი ჯაფარიძესა და მამუკა ხაზარაძეს ბრალდება თაღლითობის მუხლით გადაუკვალიფიცირა და თითოეულს 7 წლით თავისუფლების აღკვეთა მიუსაჯა, თუმცა დანაშაულის ხანდაზმულობის გამო ისინი სასჯელისგან გათავისუფლდნენ. ბრალი გადაუკვალიფიცირდა იგივე საქმეში ბრალდებულ ავთანდილ წერეთელსაც. მას პროკურატურა ფულის გათეთრებაში ამსრულებლობასა და თანამონაწილეობას ედავებოდა, თუმცა ხაზარაძე-ჯაფარიძისთვს ბრალის გადაკვალიფიცირების შემდეგ მოსამართლემ წერეთელი თაღლითობაში ამსრულებლისა და თანამონაწილობისთვის ცნო დამნაშავედ.

ისინი საქალაქო სასამართლოს მიერ გამოტანილ განაჩენს გაასაჩივრებენ. მამუკა ხაზარაძემ მის მიმართ გამოტანილი განაჩენის შეფასებისას სასამართლოს "ერთი კაცის მართლმსაჯულება".