რუსული საინფორმაციო საშუალებების ცნობით, სამხრეთ ოსეთის დეფაქტო რესპუბლიკაში დაიხურა საარჩევნო უბნები. წინასწარი შედეგების გამოცხადება ადგილობრივი დროით 23 საათიდან დაიწყება.

არაღიარებული რესპუბლიკის მოსახლეობა პრეზიდენტის არჩევნების გარდა, მონაწილეობდა რეფერენდუმში, რომლის მიზანიც სამხრეთ ოსეთისთვის სახელის შეცვლაა.

დეფაქტო არჩევნებზე აქტივობამ 81 პროცენტი შეადგინა. ეგზიტპოლის შედეგების მიხედვით, ამომრჩეველთა 45,8 პროცენტმა ხმა მისცა მოქმედ პრეზიდენტს, ლეონიდ თიბილოვს, მეორე ადგილზეა 36,9 პროცენტით ანატოლი ბიბილოვი, ხოლო მესამეზე – ალან გაგლოევი 16,8 პროცენტით. დეფაქტო სამხრეთ ოსეთის საპრეზიდენტო არჩევნებში გასამარჯვებლად ამომრჩეველთა ხმების 50 პროცენტზე მეტია საჭირო, რის გამოც, სავარაუდოდ, მეორე ტური გაიმართება.

რაც შეეხება რეფერენდუმს, ამომრჩევლებმა მხარი დაუჭირეს სამხრეთ ოსეთისთვის სახელის შეცვლას. დეფაქტო სახელმწიფოს ალანიას რესპუბლიკას დაარქმევენ.

სამხრეთ ოსეთში ჩატარებულ არჩევნებს არ აღიარებს საქართველო და დასავლური სახელმწიფოები.