საგარეო საქმეთა სამინისტრო განცხადებას ავრცელებს და წერს, რომ იგი გმობს ოკუპირებულ ცხინვალის რეგიონში, 9 აპრილის მიმდინარე საპრეზიდენტო არჩევნებსა და რეფერენდუმს.

უწყება აღნიშნულ ქმედებას რუსეთის მხრიდან პროვოკაციას უწოდებს და აცხადებს, რომ იგი არღვევს საქართველოს სუვერენიტეტსა და ტერიტორიულ მთლიანობას:

"იგი წარმოადგენს ეთნიკური წმენდის არაერთი ტალღის შედეგების, სამხედრო ინტერვენციისა და საქართველოს რეგიონების ოკუპაციის ლეგიტიმაციის მორიგ მცდელობას. საერთაშორისო სამართლის თანახმად, ნებისმიერი ე.წ. არჩევნები ან რეფერენდუმი საქართველოს ოკუპირებულ ტერიტორიებზე არის უკანონო და არ წარმოშობს რაიმე სამართლებრივ შედეგს.

საგარეო სამინისტროს განცხადებით, საქართველოს უძველესი რეგიონისათვის რუსეთის ფედერაციული სუბიექტის მსგავსი სახელის - "სამხრეთ ოსეთის რესპუბლიკა - ალანიის სახელმწიფო" - დარქმევასთან დაკავშირებით ე.წ. რეფერენდუმის ჩატარება მიზნად ისახავს რეგიონის უკანონო ანექსიისათვის საფუძველის მომზადებას:

"ეს განზრახვა მკაფიოდ წარმოჩინდა ახლახანს ხელმოწერილი ე.წ. შეთანხმებითაც, რომელიც ცხინვალის რეგიონის სამხედრო დაჯგუფებების რუსეთის ფედერაციის შეიარაღებული ძალების შემადგენლობაში გაერთიანებას ითვალისწინებს".

უწყება ასევე აღნიშნავს, რომ ასეთი ქმედებებით, რუსეთის ფედერაცია მიზანმიმართულად აფერხებს კონფლიქტის მშვიდობიანი დარეგულირების ძალისხმევას, მათ შორის, ჟენევის საერთაშორისო მოლაპარაკებების ფარგლებში და ხელს უშლის საოკუპაციო ხაზებით გაყოფილ საზოგადოებებს შორის ნდობის აღდგენას.

საგარეო საქმეთა სამინისტრო მიმართავს საერთაშორისო თანამეგობრობას, სათანადო შეფასება მისცეს ცხინვალის რეგიონში მიმდინარე არჩევნებსა და რეფერენდუმს.

სამინისტრო მოუწოდებს რუსეთის ფედერაციას, პატივი სცეს საერთაშორისო სამართლის ფუნდამენტურ პრინციპებს და გაიყვანოს თავისი სამხედრო შენაერთები საქართველოს ტერიტორიიდან.

სამხრეთ ოსეთის დე-ფაქტო რესპუბლიკაში დღეს, 9 აპრილს საპრეზიდენტო არჩევნები და "სამხრეთ ოსეთისთვის" "ალანიას" გადარქმევის საკითხზე რეფერენდუმი მიმდინარეობს.

არჩევნებში სულ სამი კანდიდატი მონაწილეობს, მათ შორის ამჟამინდელი პრეზიდენტი ლეონიდ თიბილოვი, ანატოლი ბიბილოვი და ალან გაგლოევი.

9 აპრილის არჩევნების გამო, ქართულ მხარესთან გამშვები პუნქტი სამი დღით ჩაიკეტა.