პარლამენტში, კომიტეტების გაერთიანებულ სხდომაზე, სადაც სახელმწიფო ინსპექტორის სამსახურის გაუქმებასა და მის ადგილას ორი ახალი უწყების შექმნის კანონპროექტს განიხილავენ, ხმაური იყო. საქართველოს დემოკრატიულ ინიციატივის ხელმძღვანელმა, ედუარდ მარიკაშვილმა თქვა, რომ ერთადერთი, რაც მას შეუძლია არის ის, რომ დაარქვას სახელი მიმდინარე პროცესს. მან კანონპროექტის ინიციატორებს უთხრა, რომ არიან ავტორიტარზმის წარმომადგენლები.

"ერთადერთი ჩვენ რაც შეგვიძლია, არის ის, რომ დაგარქვათ სახელი, დავარქვათ თქვენს გადაწყვეტილებებს სახელი. რომ ეს სახელი შემდგომ გამოჩნდეს, როგორც საერთაშორისო დონეზე, ესე ჩვენმა მოსახლეობამ დაინახოს თქვენ რა გქვიათ. ეს სახელი არის შემდეგი — თქვენ ახლა ყველანი ხართ ავტორიტარიზმის წარმომადგენლები. გივი, ალუდა და ა.შ.", — თქვა მარიკაშვილმა.

მას საუბარი შეაწყვეტინეს და უთხრეს, რომ შეურაცხყოფას აყენებდა. დეპუტატები მიმართავდნენ თავმჯდომარეს და თხოვდნენ, რომ მისთვის მიკროფონი გაეთიშა.

"თითი ჩაწიე", "ნუ გვებლატავები", "ჭკვიანად იყავი" — უთხრეს კომიტეტის წევრებმა ედუარდ მარიკაშვილს.

კამათში ჩაერთო ნაციონალური მოძრაობის დეპუტატი, თინა ბოკუჩავა და ალუდა ღუდუშაურს უთხრა: "ძალიან დიდი ბოდიში, ასეთი ტერმინოლოგია გამოიყენეთ ქუჩაში".

მიხეილ სარჯველაძემ რამდენჯერმე გაიმეორა ფრაზა მარიკაშვილის მისამართით — "მიკროფონი გამორთე", "გათიშე მიკროფონი", "ქართული აქ გესმით?". ამის პარალელურად კი მაჭარაშვილმა სარჯველაძეს უთხრა — "გააგდე ეს აქედან კაცო".

ამის შემდეგ, არასამთავრობო ორგანიზაციების რამდენიმე წარმომადგენლებმა, ედუარდ მარიკაშვილმა, ბაია პარატაიამ და იდა ბახტურიძემ კომიტეტების ერთობლივი სხდომა დატოვეს.

"მე ჩვენი სათქმელი დავაფიქსირე, მათ არ უნდათ, რომ კიდევ მოისმინონ დამატებით კითხვები, ამის გამო არ ვაპირებ მათთან ამ ეტაპზე, ამ ფორმატში, ამ სხდომაზე უკვე რაიმე პოზიციის დაფიქსირებას", — თქვა მარიკაშვილმა სხდომის დატოვების შემდეგ.

მანამდე სხდომა დატოვა სახელმწიფო ინსპექტორმა, ლონდა თოლორაიამ პროტესტის ნიშნად კომიტეტის სხდომა დატოვა. მან ტქვა, რომ პროცესი არის სრულიად ხელოვნური, ზრდილობისთვის, პროცედურისთვის გაკეთებული და მან თქვა, რომ ბევრად უფრო მნიშვნელოვანი საქმე აქვს.

გუშინ, 27 ნოემბერს ბიუროს სხდომაზე, ოპოზიციის წინააღმდეგობის მიუხედავად, სახელმწიფო ინსპექტორის სამსახურის გაუქმებაზე კანონპროექტის დაჩქარებული წესით განხილვას დაუჭირეს მხარი.

ამავე სხდომაზე სხდომაზე ლელოს წევრმა, ანა ნაცვლიშვილმა კანონპროექტის ალტერნატიული ვერსიის წინადადება დააყენა. როგორც ნაცვლიშვილმა განაცხადა, თუკი მათი წინადადების განსახილველად ბიუროს სხდომა არ ჩატარდებოდა, ეს რეგლამენტით გარანტირებული უფლებამოსილების წართმევად იქნებოდა აღქმული.

დღეს, ბიუროს სხდომა, სადაც ალტერნატიული წინადადება უნდა განხილულიყო, კვორუმის არარსებობის გამო ჩაიშალა. ქართული ოცნების აღმასრულებელი მდივნის, მამუკა მდინარაძის განცხადებით, ბიუროს სხდომის ჩავარდნა შეგნებული ნაბიჯი იყო და ეს მათი მხრიდან ოპოზიციის მიმართ გადადგმული პოლიტიკური სვლაა.

დღეს, 28 დეკემბერს ბიუროს სხდომა, სადაც ინსპექტორის სამსახურზე ოპოზიციის ალტერნატიული კანონპროექტი უნდა განხილულიყო, კვორუმის არარსებობის გამო ჩაიშალა. ქართული ოცნების აღმასრულებელი მდივნის, მამუკა მდინარაძის განცხადებით, ბიუროს სხდომის ჩავარდნა შეგნებული ნაბიჯი იყო და ეს მათი მხრიდან ოპოზიციის მიმართ გადადგმული პოლიტიკური სვლაა.

აღსანიშნავია, რომ პერსონალურ მონაცემთა დაცვის სამსახური აქამდეც არსებობდა. სწორედ მისი გაუქმების შემდეგ, 2019 წლიდან ამოქმედდა სახელმწიფო ინსპექტორის სამსახური და სხვა ფუნქციებიც შეითავსა.

სახელმწიფო ინსპექტორი, ლონდა თოლორაია ინსპექტორის სამსახურის შესაძლო გაუქმებასთან დაკავშირებულ პროცესს "სრულიად კონსპირაციულს" უწოდებს. მისივე განცხადებით, "ოცნების" კანონპროექტი ძალიან საშიში პრეცედენტია არა მხოლოდ სახელმწიფო ინსპექტორის სამსახურისთვის, არამედ ქვეყნისთვის და არჩევით თანამდებობაზე მყოფი ყველა პირისთვის.

თოლორაიას განცხადებით, ეს არის სიგნალი, რომ ისინი "ძალიან ჭკვიანად" უნდა იყვნენ. ის ამბობს, რომ კანონპროექტის ინიცირება წინასაახალწლო პერიოდს დაემთხვა, როდესაც დიპლომატიური კორპუსისა და საერთაშორისო ორგანიზაციების წარმომადგენლების უმრავლესობა საქართველოში არ იმყოფება. ამასთან, მისივე თქმით, ეს ასევე დაემთხვა სახელმწიფო ინსპექტორის დეკრეტში ყოფნას.

გაეროს ადამიანის უფლებათა უმაღლესი კომისრის ოფისი სახელმწიფო ინსპექტორის სამსახურის გაუქმებაზე კანონპროექტს შემაშფოთებელს უწოდებს და პარლამენტს მოუწოდებს, რომ გაიწვიოს. ამის შესახებ მათ ოფიციალურ Twitter-ზე დაწერეს.

სახელმწიფო ინსპექტორის სამსახურს მუშაობის დაწყებიდან დღემდე არაერთხელ გაუვრცელებია ინფორმაცია სამართალდამცავი ორგანოების თანამშრომლების მიერ ჩადენილი დანაშაულის შესახებ, თუმცა ყველაზე დიდი გამოხმაურება ექსპრეზიდენტ მიხეილ სააკაშვილზე მომზადებულმა დასკვნამ გამოიწვია. დოკუმენტის მიხედვით, იუსტიციის სამინისტრომ პატიმარ მიხეილ სააკაშვილის პერსონალური ინფორმაციის გასაჯაროებით კანონი დაარღვია.

უწყებამ კადრების გავრცელების გამო იუსტიციის სამინისტრო და პენიტენციური სამსახური დააჯარიმა და მათი წაშლა დაავალა. აღსანიშნავია, რომ ერთი კვირის წინ, 19 დეკემბერს ქართული ოცნების თავმჯდომარემ, ირაკლი კობახიძემ თქვა, რომ ინსპექტორის დასკვნას არ ეთანხმება. მისი განცხადებით, ექსპრეზიდენტის უფლებები არ შელახულა და როცა საუბარია იმაზე, რომ მოქალაქეებმა პრეზიდენტი იხილეს ასეთ მდგომარეობაში, სააკაშვილი ადამიანებმა მანამდეც ნახეს "სახურავზე კარლსონივით" და "თმებით როგორ ათრევდა უკრაინელი სამართალდამცავი".

ამავე თემაზე: