საქართველოში მოქმედი არასამთავროვო ორგანიზაციები ქართული ოცნების მიერ სახელმწიფო ინსპექტორის სამსახურის გაუქმების გადაწყვეტილებას ლონდა თოლორაიასა და მისი სამსახურის მიმართ ანგარიშსწორებად აფასებენ. ღია საზოგადოების ფონდის, სოფო ასათიანის განცხადებით, სახელმწიფო ინსპექტორის სამსახურის ირგვლივ მიმდინარე პროცესები არ ტოვებს არანაირ ეჭვს და კითხვის ნიშანს, რომ ეს გადაწყვეტილება არის მიზანმიმართული თავდასხმა დამოუკიდებელ ორგანოზე, რომელმაც ბოლო წლების განმავლობაში მოიპოვა და შეძლო საზოგადოებრივი ნდობა და გაუძლო იმ გამოწვევებს, რაც მის წინაშე იდგა.

"მნიშვნელოვანია იმის აღნიშვნაც, რომ ინსტიტუტი უქმდებ სრულად. ყველა ის ათობით თანამშრომელი, რომლებიც სისტემას წლების განმავლობაში ემსახურებოდნენ მიუკერძოებლად და მაღალი პროფესიონალიზმით პირველი მარტიდან სამსახურს მიღმა დარჩებიან, რაც იმას ნიშნავს, რომ არავითარი ეჭვი აღარ რჩება ამ პროცესის პოლიტიკურ ხასიათთან დაკავშირებით. ეს არის ანგარიშსწორება ლონდა თოლორაიასა და მისი სამსახურის მისამართით", — აცხადებს სოფო ასათიანი.

არასამთავრობო სექტორი ხელისუფლებას მოუწოდებს, დამოუკიდებელ ორგანოებზე მიზანმიმართული თავდასხმები შეწყვიტოს და მისცეს საშუალება ინსპექტორს სრულად განახორციელოს საკუთარი მანდატი.

ამასთან, NGO-ები საზოგადოებას ახსენებენ, რომ ინსპექტორის სამსახური დიდწლილად შეიქმნა სწორედ არასამთავრობო სექტორის ინიციატივით და ის ასევე, ასოცირების დღის წესრიგის ნაწილის მნიშვნელოვანი კომპონენტი იყო.

ქართულ ოცნებას სახელმწიფო ინსპექტორის სამსახურის გაუქმება და მის ბაზაზე ორი ახალი უწყების — სპეციალური საგამოძიებო სამსახურისა და პერსონალურ მონაცემთა დაცვის სამსახურის შექმნა სურს. შესაბამისი კანონპროექტი უკვე მომზადებული და ინიცირებულია.

აღსანიშნავია, რომ პერსონალურ მონაცემთა დაცვის სამსახური აქამდეც არსებობდა. სწორედ მისი გაუქმების შემდეგ, 2019 წლიდან ამოქმედდა სახელმწიფო ინსპექტორის სამსახური და სხვა ფუნქციებიც შეითავსა.

სახელმწიფო ინსპექტორის სამსახურს ამ პერიოდში არაერთხელ გაუვრცელებია ინფორმაცია სამართალდამცავი ორგანოების თანამშრომლების მიერ ჩადენილი დანაშაულის შესახებ, თუმცა ყველაზე დიდი გამოხმაურება ექსპრეზიდენტ მიხეილ სააკაშვილზე მომზადებულმა დასკვნამ გამოიწვია. დოკუმენტის მიხედვით, იუსტიციის სამინისტრომ პატიმარ მიხეილ სააკაშვილის პერსონალური ინფორმაციის გასაჯაროებით კანონი დაარღვია. უწყებამ კადრების გავრცელების გამო იუსტიციის სამინისტრო და პენიტენციური სამსახური დააჯარიმა და მათი წაშლა დაავალა. აღსანიშნავია, რომ ერთი კვირის წინ, 19 დეკემბერს ქართული ოცნების თავმჯდომარემ, ირაკლი კობახიძემ თქვა, რომ ინსპექტორის დასკვნას არ ეთანხმება. მისი განცხადებით, ექსპრეზიდენტის უფლებები არ შელახულა და როცა საუბარია იმაზე, რომ მოქალაქეებმა პრეზიდენტი იხილეს ასეთ მდგომარეობაში, სააკაშვილი ადამიანებმა მანამდეც ნახეს "სახურავზე კარლსონივით" და "თმებით როგორ ათრევდა უკრაინელი სამართალდამცავი".

სახელმწიფო ინსპექტორის, ლონდა თოლორაია განცხადებით, მისი სამსახურის გაუქმების შესახებ "კონსპირაციულად" დაინიცირებული კანონპროექტის შესახებ მედიიდან შეიტყო. მისი თქმით, ეს მოხდა იმ პირობებში, როცა 9 დეკემბრიდან ცდილობს პარლამენტთან კომუნიკაციას სამსახურის ინსტიტუციური გაძლიერების მიზნით შემუშავებული კანონპროექტის დაინიცირებაზე. თოლორაია აღნიშნავს, რომ ამ კოორდინაციის პროცესში, პარლამენტის წარმომადგენელთა მხრიდან არც ერთი სიტყვა თქმულა გაუქმების ინიციატივაზე.