ენერგეტიკის მინისტრის კახა კალაძის შეფასებით, პრეზიდენტ გიორგი მარგველაშვილს დღევანდელ სიტყვით გამოსვლისას ახალი არაფერი უთქვამს. კალაძის თქმით, პრეზიდენტი ზედაპირულად შეეხო საკითხებს და არ ჩაუღრმავდა:

"სიახლე არაფერი, რასაც ყოველთვის ამბობს ის მოვისმინეთ, თუმცა ვფიქრობდი, რადგან პარლამენტში მიბრძანდებოდა პრეზიდენტი, სადაც პრემიერმინისტრი, მთავრობა, დიპლომატიური კორპუსი, ყველა იყო მობრძანებული, ვფიქრობდი, რომ უფრო მომზადებული იქნებოდა. უფრო ჩაუღრმავდებოდა თემებს, უფრო ობიექტური იქნებოდა, მაგრამ ჩვენ მოვისმინეთ განსხვავებული გამოსვლა პრეზიდენტის. მე ნამდვილად არ ვეთანხმები მის მოსაზრებას ეკონომიკურ ნაწილში. იყო მიმართულებები, სადაც შეიძლება ითქვას მან კომპლიმენტებიც უთხრა მთავრობას, მაგრამ ეკონომიკურ ნაწილზე ნამდვილად არ ვეთანხმები".

საქართველოს პრეზიდენტი გიორგი მარგველაშვილი დღეს პარლამენტის პლენარულ სხდომაზე ყოველწლიური ანგარიშით წარსდგა. გამოსვლისას განაცხადა, რომ ეკონომიკური რეფორმების შემუშავება და დანერგვა ბიზნესთან კონსულტაციების გარეშე არ უნდა ხდებოდეს.

პრეზიდენტი მიიჩნევს, რომ საჭიროა კონკურენციის კანონის უფრო ქმედითად ფორმულირება, აღსრულება და კონკურენციის სააგენტოს უფრო გააქტიურება:

"სამუშაო ადგილები, სიღარიბე, ფასების ზრდა, მწირი პენსიები და ლარის არასტაბილურობა - სწორედ ეს არის ის პრობლემები, რაც ყველაზე მეტად აწუხებს საზოგადოებას და, რაც ყოველგვარი კვლევის გარეშე თვალსაჩინოა".

იგი შეეხო ქვეყანაში არსებულ კრიმუნალურ მდგომარეობას და განაცხადა, რომ კრიმინალთან ეფექტური ბრძოლისთვის გადამწყვეტია უწყებათაშორისი და ამავე დროს, საზოგადოების გამაერთიანებელი პროგრამები.

ასევე, პრეზიდენტმა პარლამენტში სიტყვით გამოსვლისას ე.წ. მოსმენების კანონთან დაკავშირებით ისაუბრა და განაცხადა, რომ საკონსტიტუციო სასამართლოს სარჩელით მიმართავს: "მივმართავ საკონსტიტუციო სასამართლოს, განსხვავებული სტატუსით, სასამართლოს მეგობრის სტატუსით".

გიორგი მარგველაშვილმა ქვეყანაში არსებულ მედიაგარემოზე და მისი თავისუფლების მნიშვნელობაზეც გაამახვილა ყურადღება და თქვა, რომ საქართველოს მოსახლეობასთან ერთად, მედიასივრცეში არსებული სახიფათო და გაუმჭვირვალე პროცესების დასრულებას საერთაშორისო საზოგადოებაც აქტიურად ელოდება.