სამოქალაქო აქტივისტი, სამირა ბაირამოვა დეპუტატ სავალან მირზოევს შეურაცხყოფაში, დისკრიმინაციასა და მუქარაში ადანაშაულებს. ბაირამოვას თქმით, მირზოევმა უთხრა, რომ სანამ დეპუტატია, მის ინიციატივებსა და კანონპროექტებს პარლამენტის მხარდაჭერა არ ექნება.

როგორც ბაირამოვა ჰყვება, ადამიანის უფლებათა და სამოქალაქო ინტეგრაციის კომიტეტის წევრებთან ერთად, 16 დეკემბერს უნდა განეხილა საკანონდებლო ინიციატივა ეთნიკური უმცირესობებისთვის უმაღლესი განათლების ხელშეწყობის შესახებ, ასევე, 21 მარტის, ნოვრუზ ბაირამის დღესასწაულის უქმე დღედ გამოცხადების იდეა. აქტივისტი ამბობს, რომ ინიციატივა თავდაპირველად განათლებისა და მეცნიერების კომიტეტში განიხილეს და მისი სრულყოფისთვის კონსულტაცია სწორედ ადამიანის უფლებათა კომიტეტში უნდა გაევლოთ. ბაირამოვას თქმით, შეხვედრის წინა დღეს მას სავალან მირზოევმა, რომელიც ამ კომიტეტის თავმჯდომარის მოადგილეა, დაურეკა და "პასუხი მოსთხოვა", რატომ არ შეუთანხმეს ეს ინიციატივები პირადად მას.

"დამირეკა, მე რატომ არ ვიცი, რომ თქვენ განათლების კომიტეტთან გქონდათ შეხვედრა, მე რატომ არ მაქვს ინფორმაციაო. თქვენ ვინა ხართ და რა ანგარიში უნდა ჩაგაბაროთ-მეთქი. ის ფიქრობს, რომ რადგან აზერბაიჯანული კვოტით არის, მისგან უნდა ავიღოთ ნებართვა, თითქოს პარლამენტი მისი კერძო საკუთრებაა.

მერე დაიწყო, რომ მე სანამ ამ პარლამენტში ვარ, არც შენსას, არც სხვისას — არ აქვს მნიშვნელობა — თქვენს ინიციატივებს, რომელიც ეხება აზერბაიჯანელებს, არც ერთს მხარდაჭერა არ იქნება. ყველაფერს გავაკეთებ, რომ არც ხვალინდელი შეხვედრა შედგეს, არც ეს თქვენი იდეები, ინიციატივები იყოს მიღებული პარლამენტშიო", — გვიყვება ბაირამოვა.

ის ამბობს, რომ კიდევ ერთი მიზეზი, რამაც მირზოევის გაღიზიანება გამოიწვია, არის ერთ-ერთი აქტივისტი, რომელიც შეხვედრას მასთან ერთად უნდა უნდა დასწრებოდა.

"სიაში იყო ერთ-ერთი [ეთნიკურად] აზერბაიჯანელი აქტივისტი, არასამთავრობო ორგანიზაციის წარმომადგენელი, ოღონდ მას ეძახიან სომეხს, იმიტომ, რომ სომხებთან მეგობრობს და ერთხელ იყო სომხეთში. მითხრა, შენ ხომ იცი, რომ ეგ სომეხია. ანუ, ამით იმის თქმა უნდა, რომ არ მოსწონს ეს ადამიანი და არ უნდა, რომ ის მივიდე პარლამენტში. თითქოს მისი სახლია პარლამენტი. ვუთხარი, თქვენ თუ მასთან გაქვთ რაიმე პრობლემა, მე არანაირად არ მეხება-მეთქი", — ამბობს ბაირამოვა.

მისი თქმით, მირზოევთან საუბრიდან ორ საათში კომიტეტის აპარატიდან აცნობეს, რომ შეხვედრა გაუქმდა, მიზეზად კი თავმჯდომარის მოუცლელობა დაუსახელეს.

"ორი საათის შემდეგ, მიუხედავად იმისა, რომ წინასწარ დაგეგმილი გვქონდა კომიტეტთან შეხვედრა, აპარატის უფროსმა მომწერა, სამწუხაროდ, კომიტეტის თავმჯდომარე ვერანაირად ვერ ახერხებს და შეხვედრა გადაიდოო.

მე მივწერე, ვიცი, რატომ გადაიდო — იმიტომ, რომ კომიტეტის თავმჯდომარის მოადგილემ დამირეკა, შეურაცხყოფა მომაყენა, დამემუქრა [...] მითხრა, რომ მათ არ ჰქონდათ ინფორმაცია ამის შესახებ", — გვიყვება ბაირამოვა.

აქტივისტი აღნიშნავს, რომ მისი რეაქციის შემდეგ კომიტეტის აპარატიდან ისევ დაურეკეს და უთხრეს, რომ თავმჯდომარეს შეეძლო 30-40 წუთის გამოყოფა მისთვის, თუმცა ამჯერად შეხვედრაზე უარი თავად თქვა. სამირა ბაირამოვას თქმით, თავდაპირველად ჰქონდა მოლოდინი, რომ ადამიანის უფლებათა კომიტეტთან შეხვედრა ნაყოფიერი და შედეგზე ორიენტირებული იქნებოდა; მირზოევის ზარის შემდეგ კი ფიქრობს, რომ თუ შეხვედრა მაინც შედგება, ის იქნება ზედაპირული და "მხოლოდ სურათის გადაღებისთვის".

მისი განცხადებით, მას შემდეგ, რაც ეს ამბავი მედიაში გახმაურდა, მირზოევმა შეტყობინება გაუგზავნა და უთხრა, რომ "ცოტა ემოციურად გამოუვიდა" და თუ ეწყინა, ბოდიშს უხდის.

"ამ ადამიანს აქვს კომპლექსი და ფიქრობს, იმიტომ ვაკეთებთ ამას, რომ მისი ადგილი გვინდა, კვოტით რაც არის განსაზღვრული. მე საერთოდ არანაირი პოლიტიკური ინტერესი არ მაქვს. მე სამოქალაქო აქტივისტი ვარ და რაც ჩემს საქმეს ეხება, ვაკეთებ", — ამბობს ბაირამოვა.

სამირა ბაირამოვას განცხადებით, უკვე მიმართა პარლამენტის თავმჯდომარეს, კახა კუჭავას, კომიტეტის თავმჯდომარეს, მიხეილ სარჯველაძეს, პარლამენტის ეთიკის კომისიასა და სახალხო დამცველს. ის სავალან მირზოევის ქმედებაზე შესაბამის რეაგირებას ითხოვს.

სახალხო დამცველის აპარატში On.ge-ს უთხრეს, რომ ბაირამოვას განცხადება მიიღეს და უახლოეს დღეებში გადაწყდება, დაიწყებს თუ არა საქმის მოკვლევას ომბუდსმენი. რაც შეეხება პარლამენტში შეტანილ განცხადებებს, ამასთან დაკავშირებულ კითხვებზე საკანონმდებლო ორგანოდან პასუხის მიღებას ვერ ვახერხებთ. ვცადეთ დაკავშირება ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარესთან, მიხეილ სარჯველაძესთან, თუმცა ის ზარებს მე-4 დღეა არ პასუხობს. ჩვენს ზარებს არ პასუხობს არც კომიტეტის აპარატის უფროსი, კობა გრიალაშვილი.

On.ge-მ დამატებითი დეტალების გარკვევა თავად სავალან მირზოევთანაც სცადა. დეპუტატმა თავდაპირველად გვითხრა, რომ არ სცალია და მოგვიანებით საუბარი შემოგვთავაზა, თუმცა შემდეგ ჩვენს ზარებს აღარ უპასუხა. ორდღიანი მცდელობის შემდეგ, მირზოევმა გვითხრა, რომ ამ საკითხთან დაკავშირებით კომენტარს არ გააკეთებს და მობილური გათიშა.