ერთ მშვენიერ დღეს ბრაზილიაში მცხოვრებმა სანტოს ლარამ გადაწყვიტა, ციცქნა შინაური ცხოველი — "მინიატურული გოჭი" შეეძინა, რომელიც ზომაში არ იზრდება. გოჭმა, სახელად ლილიკამ ზრდა დაიწყო, თუმცა არ დაუსრულებია და დღეს 250 კილოგრამს იწონის.

"ყოველთვის ვფიქრობდით, რომ ზრდას შეწყვეტდა, თუმცა ის იზრდებოდა და იზრდებოდა. გოჭმა წარმოუდგენელ ზომას მიაღწია, თუმცა ის გვიყვარს და მოვუვლით კიდეც", — აცხადებს პატრონი.

3 წლის ლილიკა დღეში დაახლოებით 5 კილოგრამ ხილს, ბოსტნეულსა და სპეციალურ საჭმელს ჭამს და პატრონის პატარა სახლში თავს მშვენივრად გრძნობს.

ფოტო: lilica_pig

"ძალიან ჯიუტი ცხოველია. ურყევი ხასიათი აქვს. როდესაც რამე უნდა, ვერ შეაჩერებ, ვერ შეეწინააღმდეგები. ძალიან ხმაურობს, განსაკუთრებით მაშინ, როდესაც შია. ამ დროს მაცივარსა და კარადებს აღებს და არც სახლის არევას ერიდება, როცა გაბრაზებულია", — ამბობს პატრონი.

ლილიკას სახლში საკუთარი საწოლი აქვს. ოჯახის გარდა, ღორი მეზობლებსა და ბავშვებსაც განსაკუთრებულად უყვართ. მას ხშირად ეფერებიან და ფოტოებსაც უღებენ. ლილიკა მეზობლების ცუგებსაც დაუმეგობრდა.

სანტოს ლარას თქმით, ლილიკას გაყიდვა ბევრჯერ შესთავაზეს, თუმცა მეგობრის დათმობას არ აპირებს.