საგარეო საქმეთა მინისტრის, დავით ზალკალიანის თქმით, კმაყოფილია იმ რეაქციით, რაც რუსეთის საგარეო საქმეთა სამინისტროს განცხადებას მოჰყვა დასავლეთში. საუბარია სერგეი ლავროვის უწყების 11 დეკემბერს განცხადებაზე, რომლის მიხედვითაც რუსეთი მოითხოვს საქართველოსა და უკრაინის ნატოში შესვლის დაპირება.

"ამავე დროს ჩვენ ვიხილეთ ძალიან მკაფიო განცხადებები ჩვენი ევროპელი და NATO-ელი პარტნიორების მხრიდან, ასევე აშშ-ს უმაღლესი თანამდებობის პირების მხრიდან. თქვენ იხილეთ გუშინ აშშ-ს სახელმწიფო მდივნის განცხადება, რომელმაც ძალიან მკაფიოდ განაცხადა, რომ 2008 წლის ბუქარესტის სამიტის გადაწყვეტილებები არ გადაიხედება. ეს ასეა.

თუკი იმ შეთანხმების, რაც არის დაფუძნებული საერთაშორისო ურთიერთობების ფუნდამენტურ პრინციპებზე, გადახედვა მოხდა, მთლიანად ჩამოინგრევა საერთო ევროპული, ევროატლანტიკური უსაფრთხოების სისტემა. ეს არის, რასაც რუსეთის ფედერაცია ცდილობს და ამას უნდა დაუპირისპირდეს ერთიანი პოზიცია ჩვენი NATO-ელი და ევროპელი პარტნიორების, რასაც აკეთებენ და მე ძალიან კმაყოფილი ვარ იმ რეაქციით, რა რეაქციაც მოჰყვა იმ განცხადებებს ჩვენი NATO-ელი პარტნიორების მხრიდან", — განაცხადა ზალკალიანმა.

მინისტრმა ყურადღება გაამახვილა NATO-ს წესდების მე-19 პუნქტზე, რომლის მიხედვითაც ქვეყანა ალიანსის წევრი გახდება, თუ ის ყველა დაწესებულ კრიტერიუმს შეასრულებს და თავად NATO-ს შიგნითაც იქნება კონსენსუსი გაწევრებაზე. ზალკალიანი ამბობს, რომ რუსეთის მხრიდან მსგავსი განცხადებების მიუხედავად, საქართველოს უნდა ჰქონდეს მწყობრი და თანმიმდევრული ნაბიჯები NATO-ში ინტეგრაციისკენ და უნდა დაველოდოთ "პოლიტიკურ მომენტს".

"მიუხედავად იმისა, რომ ჯერ შიგნით პოლიტიკური კონსენსუსი არ შემდგარა, NATO-ს წევრ ქვეყნებს შორის, ამას ჩენ არ უნდა მოგვადუნოს და პირიქით, უნდა გავაგრძელოთ ის მწყობრი ნაბიჯები, რეფომები ყველა მიმართულებით — თავდაცვის, უსაფრთხოების კუთხით, ქვეყნის აღმშენებლობის თვალსაზრისით, რომ ვიყოთ მზად მომენტისთვის, როდესაც პოლიტიკური მომენტი დადგება", — განაცხადა დავით ზალკლაინმა.

რუსეთის საგარეო საქმეთა სამინისტრო მოითხოვს, გაუქმდეს 2008 წლის ბუქარესტის სამიტის გადაწყვეტილება, რომლის მიხედვითაც საქართველო და უკრაინა ნატოში უნდა გაწევრიანდნენ. სერგეი ლავროვის უწყებამ "რუსეთის უსაფრთხოების დაცვის" მოტივით მოთხოვნებით სავსე განცხადება გამოაქვეყნა, რომელშიც დასავლეთი, ყველაზე მეტად კი აშშ და ნატოს წევრი ქვეყნები არის გაკრიტიკებული.

საპასუხოდ, სამხრეთ კავკასიასა და ცენტრალურ აზიაში NATO-ს გენერალური მდივნის სპეციალურმა წარმომადგენელმა, ხავიერ კოლომინამ ტვიტერზე დაწერა, რომ ალიანსი რჩება ბუქარესტის სამიტზე მიღებული გადაწყვეტილების ერთგული. რუსეთის განცხადებას გამოეხმაურა NATO-ს გენერალური მდივანიც. იენს სტოლტენბერგის განცხადებით, ყველა ერს აქვს უფლება აირჩიოს საკუთარი გზა.

საქართველოს საგარეო საქმეთა სამინისტრო ოკუპანტის ქვეყნის საგარეო საქმეთა სამინისტროს განცხადებას მიუღებელს უწოდებს. უწყებაში აცხადებენ, რომ NATO-ში გაწევრიანება საქართველოს სუვერენულ გადაწყვეტილებას წარმოადგენს, რომელიც დაფუძნებულია საქართველოს მოსახლეობის უმრავლესობის ურყევ ნებაზე. აღნიშნული მიზანი ასახულია საქართველოს კონსტიტუციაშიც.

გაიგე მეტი: