"თვალი რომ გავახილე, ვერ ვიჯერებდი, რომ ცოცხალი ვიყავი", — ასე აღწერს ბრიტანეთის მოქალაქე, ვიშვაშკუმარ რამეში, Air India-ის კატასტროფიდან თავის დაღწევის წუთებს. თვითმფრინავის ჩამოვარდნის შედეგად ბორტზე მყოფი 241 ადამიანიდან, ის ერთადერთია, ვინც ცოცხალი გადარჩა.

ტრაგედია 12 ივნისს მოხდა, როცა აჰმედაბადში აფრენიდან რამდენიმე წუთში ლონდონის მიმართულებით მიმავალი რეისი საცხოვრებელ უბანში ჩამოვარდა. Air India-ის განცხადებით, ავიაკატასტროფას 229 მგზავრი და ეკიპაჟის 12 წევრი ემსხვერპლა. ერთადერთი გადარჩენილი — 40 წლის რამეში — თვითმფრინავის 11A ადგილზე იჯდა.

მისი თქმით, თვითმფრინავის ის მხარე, სადაც ის იჯდა, საცხოვრებელი შენობის პირველ სართულზე ჩამოვარდა, თვითმფრინავის კარი გატყდა და ამის საშუალებით მოახერხა გაქცევა. "ღვედი გავხსენი და თავი დავიხსენი თვითმფრინავიდან", — თქვა მან.

თვითმფრინავის ჩამოვარდნისას რამეშმა მარცხენა ხელზე დამწვრობა მიიღო, შოკის მდგომარეობაში რამდენიმე მეტრი ფეხითაც გაიარა, სანამ ადგილობრივები არ დაეხმარნენ და საავადმყოფოში გადაიყვანეს. შემთხვევის შემდეგ გადაღებულ ვიდეოშიც ჩანს, როგორ მიაბიჯებს დაშავებული და სისხლში მოთხვრილი რამეში სასწრაფო დახმარების მანქანისკენ. პოლიციის ინფორმაციით, რამეში საავარიო გასასვლელის რიგში იჯდა და დროულად მოახერხა თვითმფრინავიდან გადახტომა.

ინდოეთის პრემიერმინისტრი, ნარენდრა მოდი, შემთხვევის ადგილზე მეორე დღეს ჩავიდა და გადარჩენილი მგზავრი პალატაში მოინახულა. "მოდის მოვუყევი, რაც ვნახე. მან ჯანმრთელობის მდგომარეობაზე მკითხა", — თქვა რამეშმა.

მკურნალი ექიმის, დავით გამეტის, თქმით, ჩამოვარდნის შემდეგ პაციენტი დეზორიენტირებული იყო, სხეულზე მრავლობითი დაზიანებით, თუმცა საფრთხე ამ ეტაპზე აღარ ემუქრება.

რამეში, რომელსაც საავადმყოფოში შეყვანისას ხელში ჯერ კიდევ ეჭირა "ბორდინგ პასი", იხსენებს: "ვუყურებდი, როგორ იღუპებოდნენ ადამიანები ჩემ თვალწინ, თვითმფრინავის ნამსხვრევები კი ყველგან იყო მიმოფანტული".

რამეში ძმასთან ერთად მოგზაურობდა. ავარიის შემდეგ ის ლესტერში მცხოვრებ ნათესავებს დაუკავშირდა. მისი ბიძაშვილი BBC-ისთან ამბობს: "მხოლოდ ის გვითხრა, რომ კარგად არის. ოჯახი გახარებულია, თუმცა ვდარდობთ მეორე ძმაზე".

ეს შემთხვევა ერთ-ერთი ყველაზე მასშტაბური ავიაკატასტროფაა ინდოეთის ისტორიაში და პირველი ფატალური ინციდენტია Boeing 787-8 Dreamliner ტიპის თვითმფრინავისთვის, რომლებიც 2009 წლიდანაა ექსპლუატაციაში.

ამჟამად რამეში ადგილობრივ სახელმწიფო საავადმყოფოში იმყოფება. ეროვნული მაუწყებლისთვის მიცემულ ინტერვიუში მან ავარიის მომენტებიც გაიხსენა. მისი თქმით, აფრენიდან რამდენიმე წამში თვითმფრინავი თითქოს ჰაერში გაჩერდა. "წითელი და მწვანე ნათურები აინთო. შემდეგ თვითმფრინავმა სიჩქარე აკრიფა, თუმცა სიმაღლე ვეღარ აიღო და ჩამოვარდა"

Air India-ის ლონდონის მიმართულებით მომავალი რეისი აფრენიდან მალევე აჰმედაბადის საცხოვრებელ უბანში ჩამოვარდა. ავიაკატასტროფას 229 მგზავრი და ეკიპაჟის 12 წევრი ემსხვერპლა.